Tennis bo‘yicha O‘zbekiston terma jamoasi Devis Kubogining Osiyo-Okeaniya mintaqasi saralash bosqichida Livan terma jamoasi bilan bahs olib bordi, deb xabar berdi MOQ matbuot xizmati.
Tennischilarimiz Juniya shahrida Livan terma jamoasi mehmoni bo‘ldilar. Ushbu qarama-qarshilikda mamlakatimizning birinchi raketkasi Denis Istomin ishtirok etmadi. U ayni paytda Turkiyaning Istanbul shahrida o‘tayotgan turnirda muvaffaqiyatli qatnashyapti.
O‘zbekiston terma jamoasi Livan termasi ustidan 3:2 hisobida g‘alaba qozondi.
Shu tariqa, tennis bo‘yicha O‘zbekiston terma jamoasi Osiyo-Okeaniya saralashidan muvaffaqiyatli o‘tib, kelasi yil mart oyida bo‘lib o‘tadigan jahon pley-off bosqichiga yo‘llanma oldi.
