Регистонда ўтказилган «тўй»: қадимий гўшада хорижий делегация шарафига тантанали кеча ўтказишга ким рухсат берди?

Ўзбекистон 23:08 / 12.09.2019 110992

Ижтимоий тармоқларда 8 сентябрь куни Самарқанднинг Регистон майдонидаги Улуғбек мадрасасида туғилган кун ёки тўй ўтказилгани ҳақидаги видео катта мунозараларга сабаб бўлмоқда.

«Тарихий обиданинг ичида бунақа «байрам» ўтказиш мумкинми? Ким бўлган тақдирда ҳам. Тадбир қиламан деса шаҳримизда муҳташам ресторанлар бор эди-ку?» деб савол бермоқда фойдаланувчилар.

Маълум бўлишича, Улуғбек мадрасасида ҳеч қанақа тўй ёки туғилган кун нишонланган эмас.

Самарқанд вилояти ҳокимлигининг Kun.uz’га маълум қилишича, Ўзбекистон Республикаси Ташқи ишлар вазирининг биринчи ўринбосари И.Неъматовнинг 2019 йил 30 июлдаги хатида АҚШ ва Канада бухоро яҳудийлари Конгресси раҳбари Борис Қандов бошчилигидаги делегациянинг юртимизга (80 нафар) 2019 йил 2–9 сентябрь кунлари «Зиёрат туризми» дастури асосида ташриф буюриши қайд этилган.

Мазкур дастурга асосан, 6 сентябрь куни Самарқанд шаҳрида «Америка ва Ўзбекистон тадбиркорлари ўртасида ҳамкорлик масалалари»га бағишланган бизнес форум ва бошқа тадбирлар билан биргаликда, 8 сентябрь куни «Регистон» ансамблида меҳмонлар учун қабул маросими ўтказилиши режалаштирилган.

7 сентябрь куни «Регал Палас» меҳмонхонасида меҳмонлар учун вилоят ҳокимлиги томонидан расмий қабул ўтказилиб, тадбирда санъаткор, Ўзбекистоннинг Исроилдаги туризм элчиси Хай Давидов чиқиши бўлиб ўтди.

Дастур доирасида 8 сентябрь куни Регистон майдонидаги Улуғбек мадрасасида «Ор Авнер» синагоги, Самарқанд яҳудийлар бирлашмаси томонидан делегация аъзолари учун қабул ўтказилган.

Самарқандлик мустақил блогер Мирзо Субҳоновнинг ўз блогида маълум қилишича, Самарқанд вилоят ҳокими Э.Турдимов ушбу тадбирни ўтказишга ўзи рухсат берган бўлса-да, ҳокимлик айбни Ташқи ишлар вазирлигига ағдаришга ҳаракат қилмоқда. Гўёки, тадбир ТИВнинг 2019 йил 30 июлдаги хати асосида амалга оширилгандек. Ҳолбуки, ТИВ ўзининг юқоридаги хатида «Регистондаги банкет» деб номланган тадбир ва бошқаларни ўтказиш масаласини Самарқанд вилоят ҳокимлиги томонидан «ваколат доирасида тегишлилиги бўйича кўриб чиқиш» учун йўналтирган, холос.

Бундан ташқари, Самарқанд вилоят ҳокимига номига Самарқанд яҳудийлари диний жамоати, «Ор Авнер» синагогаси номидан Самарқанд яҳудийлар жамоати раиси И.Муллажонов имзоси билан 19 августдаёқ келиб тушган мурожаатга вилоят ҳокими «Ташкиллаштирилсин» деган «виза» билан вилоят ҳокими ўринбосарлари Б.Нуруллаев, Р.Қобилов, вилоят ҳокимлиги ишлар бошқармаси бошқарувчиси Б.Раҳматуллаев, маданият бошқармаси бошлиғи Х.Муҳаммадиев ва Самарқанд шаҳар ҳокими Б.Облоқуловга топшириқ берган.

Ушбу мурожаатда И.Муллажонов вилоят ҳокими Э.Турдимовдан Регистон майдонида 7 сентябрь куни соат 20:00 да юмористик концертлар, 8 сентябрь куни соат 20:00 да тантанали кеча ўтказишга рухсат сўраган. 7 сентябрь куни юмористик концерт бўлиб ўтмаган. Тадбир фақат 8 сентябрь куни ўтказилган, меҳмонлардан бири томонидан суратга олинган тантанали кечанинг видеоси тармоқларда тарқалган.

Кўпроқ янгиликлар