O‘zbekistonda notarial harakatlarni amalga oshirish uchun murojaat qilgan shaxslarning barmoq izlarini skaner qilish asosida biometrik ma'lumotlar bilan solishtirish orqali shaxsini aniqlash mexanizmini joriy qilinadi.
Bu haqda 2019-2021 yillarda notariat institutini yanada takomillashtirish bo‘yicha “Yo‘l xaritasi”da aytilgan. Bu borada tegishli tashkiliy chora-tadbirlar 2020 yil yanvar oyigacha ishlab chiqiladi. Ijro etilishiga mas'ul - Adliya vazirligi, Ichki ishlar vazirligi.
Shuningdek, notariuslarni ishdan ajralmagan holda malakasini oshirish tizimi joriy qilinadi. Tegishli tashkiliy chora-tadbirlar 2020 yil yanvar oyigacha ishlab chiqiladi. Ijro etilishiga mas'ul - Adliya vazirligi, Axborot texnologiyalari va kommunikatsiyalarini rivojlantirish vazirligi.
Bundan tashqari, davlat xizmatlari markazlari, fuqarolik holati dalolatnomalarini yozish organlari hamda notarial idoralari faoliyatini baholash va monitoringini tashkil etish bo‘yicha professional konsalting firmalari bilan shartnomalar tuziladi.
2020 yil fevral oyiga qadar Adliya vazirligi tomonidan tegishli kompleks chora-tadbirlar ishlab chiqiladi.
