Apple 10 сентябрда учта янги iPhone’ни тақдим қилади

Технология 23:40 / 09.09.2019 20793

Apple компанияси 10 сентябрда “Стив Жобс номидаги театр”да белгиланган тадбирда янги моделдаги учта iPhone’ни ва яна бошқа янги қурилмаларини тавдим қилади.   

Appleinsider сайтида маълум қилинишича, компания смартфонларга янги ном беришда узоқ ўйлаб ўтирмай, охирги моделида қўллаган X рим рақамидан кейин одатий рақамларга ўтишга қарор қилиб, янги қурилмаларини  iPhone 11 (янгиланган XR), iPhone 11 Pro ва iPhone 11 Pro Max деб номлади.

Тошкент вақти билан соат 22:00да бошланадиган тақдимот “Инновациялар туфайлигина” (By Innovations Only) деб номланган.

Маълум қилинишича, янги iPhone’ларнинг Pro-версиялари уч камерали (зум, стандарт ва кенг бурчакли) бўлади. Улардан ҳар бирининг суратга олиш қобилияти 12 Мпни ташкил қилади. 

Ҳар учала объектив бир вақтда суратга олади, янги дастурий таъминот эса суратни автоматик коррекция қилади. Янги тизим профессионал камералар даражасида юқори сифатли суратлар олишга имкон беради. Ёруғланганлик паст даражада бўлганда суратга олиш сифати яхшиланади.

Фото: Twitter\MarcRumos

Селфи-камера 12 Мпгача оширилади. Янгиланган юзни таниш тизими Face ID смартфон эгасини ҳар томондан таний олади. Энди смартфонни блокдан чиқариш, хабар ёзиш учун уни юз олдига олиб келиш шарт бўлмайди.

Смартфонлардан кутилаётган яна бир функция AirPods қулоқчини ёки Apple Watch соатини смартфон орқасига қўйиб симсиз қувватлаш ҳисобланади. Шунингдек, янги айфонлар корпуси мустаҳкамроқ ва сувга чидамлироқ бўлади. 

Смартфонлар янгиланган OLED-экранлар олади. Уларда экранни босиш кучини ўлчовчи 3D Touch технологияси янги Haptic Touch технологиясига алмаштирилади.

iPhone XR вориси қўш камера олади. Барча смартфонлар A13 процессорида ишлайди. Янги айфонлар 5G тармоқларини қўллаб-қувватламайди, бундай имконият 2020 йилги моделлардагина пайдо бўлади.

Шунингдек, компания iPad Pro’нинг янги моделларини ва мактаблар учун ҳамёнбоп iPad’ни намойиш қилади. Планшетлар модернизацияланган камералар ва тезкор процессорлар олади. 

Компаниянинг ақлли соатлари бироз янгиланиб, watchOS 6 операцион тизими ва титан ҳамда керамикадан ишланган янги корпуслар олади.

Шунингдек, янги 16 дюймли MacBook Pro ноутбуклари тақдим қилинади.

Кўпроқ янгиликлар