Президент МОҚ қошидаги спорт тиббий марказини танқид қилди. У Жисмоний тарбия ва спорт вазирлиги тасарруфига ўтказилади

Спорт 15:51 / 05.09.2019 2741

Ўзбекистон Республикаси Президенти Шавкат Мирзиёев раислигида 4 сентябрь куни жисмоний тарбия ва спортни ривожлантириш, халқаро мусобақаларга тайёргарликни кучайтириш масалаларига бағишланган видеоселектор йиғилиши ўтказилди. 

«Миллий Олимпия қўмитаси қошидаги Республика спорт тиббий маркази фаолияти ва унинг мутахассислари малакаси замонавий спорт тиббиёти талабларига жавоб бермаслигини таъкидлаш зарур. Ушбу Спорт тиббиёт марказининг аниқ молиялаштириш манбаси бўлмагани сабабли, фақат бир нечта олимпия спорт турлари бўйича терма жамоаларга хизмат кўрсатиб, қолган вақтда аҳолига пуллик хизмат кўрсатиш билан машғул бўлиб қолган. 

Бу эса, ўз навбатида, миллий терма жамоалар захирасидаги спортчиларни чуқурлашган тиббий кўрикдан ўтказишга ва соғлиғини доимий назоратда ушлаб туришга халақит бермоқда. Шуни ҳисобга олиб, Жисмоний тарбия ва спорт вазирлиги (Набиев), Молия вазирлиги (Қўчқоров), Соғлиқни сақлаш вазирлиги (Шодмонов), Миллий Олимпия қўмитаси (Шоабдурахмонов) бир ой муддатда, Республика спорт тиббий марказини Жисмоний тарбия ва спорт вазирлиги тасарруфига ўтказиш ҳамда аниқ молиялаштириш манбаларини белгилаш бўйича тегишли қарор лойиҳасини киритсин.

Жисмоний тарбия ва спорт соҳасида мутахассисларни қайта тайёрлаш ва малакасини ошириш маркази фаолияти ҳам қониқарсиз аҳволда. Ушбу Марказ томонидан спорт турлари, жумладан олимпия спорт турлари бўйича ҳакам (судья)ларни тайёрлаш ва малакасини ошириш юзасидан амалий ишлар ташкил этилмаган. Шунингдек, мазкур Марказ халқаро спорт турлари бўйича федерациялар ва йирик спорт ташкилотлари билан алоқаларни йўлга қўймаганлиги оқибатида, терма жамоалар билан ишлайдиган тренерлар ва бошқа мутахассисларнинг савияси ва билими бугунги кун талабларига жавоб бермайди. Бундан ташқари, илғор инновацион технологиялар, методикалар ва спорт илмий ютуқларини жорий этиш билан ҳеч ким шуғулланмаяпти.

Жисмоний тарбия ва спорт вазирлиги (Набиев), Миллий Олимпия қўмитаси (Шоабдурахмонов), Жисмоний тарбия ва спорт университети (Болтабаев) спорт федерациялари билан биргаликда бир ой муддатда мазкур Марказда юқори малакали тренерлар, ҳакамларни тайёрлаш ва малакасини ошириш бўйича ўқув дастурлари ва методологиясини янгилаш, спортчиларнинг тайёргарлик жараёнига илғор инновацион технологияларни жорий этиш бўйича аниқ чора-тадбирларни ишлаб чиқсин ва амалга оширсин», - дея давлат раҳбарининг сўзларини келтирмоқда Kun.uz мухбири.

Кўпроқ янгиликлар