1999 йилда элекричкада йўқолиб қолган беларуслик қиз Россияда топилиб, ота-онасига қайтарилди. Бу ҳақда Беларусь ички ишлар вазирлиги матбуот хизмати маълум қилди. 

4 ёшли Юля исмли қизча 1999 йил 1 октябрда Минск-Осиповичи электричкасида йўқолиб қолган. У отаси билан кетаётган бўлган. Ота спиртли ичимлик истеъмол қилиб, ухлаб қолган, уйғонганда эса қизи ёнида бўлмаган. Қизнинг ота-онаси дастлаб фарзандларини мустақил қидира бошлашган, станциялар бўйлаб юриб, сотувчилар ва йўловчилардан қизлари ҳақида сўрашган, унинг суратларини турли жойларга ёпиштириб чиқишган. Уринишлар бесамар кетгач, улар милицияга мурожаат қилишган.

Юляни поездлар, вокзалларда, ОАВ орқали қидиришган. Бироқ қизни топишга муваффақ бўлинмаган, аммо қидирув ҳақидаги иш ёпилмаган. Қизнинг ота-онаси умидини сўндирмаган ва қизи тириклигига ва бир кун топилишига ишонган. 

Қизнинг ота-онаси дилбанди билан 20 йилдан кейин яна топишишга муваффақ бўлди. Юлия билан алоқада бўлган Илья деган йигит у етим эканлиги, асраб олинганидан хабар топган. Юля унга электричкада йўқолиб қолганини эслашини айтган. Шундан кейин йигит интернетда бедарак йўқолган қиз ҳақидаги шунга ўхшаш воқеа чоп этилган манбани топган. Шундан кейин Юлия ва Илья Беларусь ички ишлар вазирлигига мурожаат қилишган. 

Қиз билан қидирув бўлими ходимлари боғланишгач, у 1999 йилда Рязандаги темирйўл станциясида топиб олинганини эслаган. Суратлар солиштирилиб, суд экспертизалари ўтказилгач, Юлиянинг эҳтимолий онаси билан ДНКси солиштирилган. Шундан кейин ушбу аёл Юлиянинг онаси эканлигига ҳеч қандай шубҳа қолмаган.

Ҳозирда қаҳрамонимиз Рязанда яшаб, бир қиз фарзандни тарбияламоқда. У ўз уйидан бунчалик узоқларга кетиб қолганини эслай олмайди. Фақатгина электричкада узоқ кетгани, Рязанда эса уни поезддан милиция ходимлари тушириб олишгани ёдида. Бироқ милицияда қиз беларусча талаффуз билан гапирганига нимагадир эътибор қаратилмаган.

Ҳозир Юлия қариндошлари кўплигидан хурсанд. Қизнинг айтишича, уни йўқотиб қўйган отасидан хафа эмас.