1999 yilda elekrichkada yo‘qolib qolgan belaruslik qiz Rossiyada topilib, ota-onasiga qaytarildi. Bu haqda Belarus ichki ishlar vazirligi matbuot xizmati ma'lum qildi.
4 yoshli Yulya ismli qizcha 1999 yil 1 oktyabrda Minsk-Osipovichi elektrichkasida yo‘qolib qolgan. U otasi bilan ketayotgan bo‘lgan. Ota spirtli ichimlik iste'mol qilib, uxlab qolgan, uyg‘onganda esa qizi yonida bo‘lmagan. Qizning ota-onasi dastlab farzandlarini mustaqil qidira boshlashgan, stansiyalar bo‘ylab yurib, sotuvchilar va yo‘lovchilardan qizlari haqida so‘rashgan, uning suratlarini turli joylarga yopishtirib chiqishgan. Urinishlar besamar ketgach, ular militsiyaga murojaat qilishgan.
Yulyani poyezdlar, vokzallarda, OAV orqali qidirishgan. Biroq qizni topishga muvaffaq bo‘linmagan, ammo qidiruv haqidagi ish yopilmagan. Qizning ota-onasi umidini so‘ndirmagan va qizi tirikligiga va bir kun topilishiga ishongan.
Qizning ota-onasi dilbandi bilan 20 yildan keyin yana topishishga muvaffaq bo‘ldi. Yuliya bilan aloqada bo‘lgan Ilya degan yigit u yetim ekanligi, asrab olinganidan xabar topgan. Yulya unga elektrichkada yo‘qolib qolganini eslashini aytgan. Shundan keyin yigit internetda bedarak yo‘qolgan qiz haqidagi shunga o‘xshash voqea chop etilgan manbani topgan. Shundan keyin Yuliya va Ilya Belarus ichki ishlar vazirligiga murojaat qilishgan.
Qiz bilan qidiruv bo‘limi xodimlari bog‘lanishgach, u 1999 yilda Ryazandagi temiryo‘l stansiyasida topib olinganini eslagan. Suratlar solishtirilib, sud ekspertizalari o‘tkazilgach, Yuliyaning ehtimoliy onasi bilan DNKsi solishtirilgan. Shundan keyin ushbu ayol Yuliyaning onasi ekanligiga hech qanday shubha qolmagan.
Hozirda qahramonimiz Ryazanda yashab, bir qiz farzandni tarbiyalamoqda. U o‘z uyidan bunchalik uzoqlarga ketib qolganini eslay olmaydi. Faqatgina elektrichkada uzoq ketgani, Ryazanda esa uni poyezddan militsiya xodimlari tushirib olishgani yodida. Biroq militsiyada qiz belaruscha talaffuz bilan gapirganiga nimagadir e'tibor qaratilmagan.
Hozir Yuliya qarindoshlari ko‘pligidan xursand. Qizning aytishicha, uni yo‘qotib qo‘ygan otasidan xafa emas.
