Россияда куч тузилмалари ходимларининг фарзандларини ўлдиришга чақирган блогер олти йилга қамалиши мумкин

Жаҳон 09:33 / 03.09.2019 6547

Россия прокуратураси ижтимоий тармоқларда ҳуқуқни муҳофаза қилиш ходимларининг фарзандларига нисбатан зўравонлик қилишга чақирган блогер Владислав Синицани олти йилга озодликдан маҳрум қилишни сўрамоқда. 

Терговнинг аниқлашича, 31 июль куни Twitter ижтимоий тармоғида Макс Стеклов исмли фойдаланувчи ҳуқуқни муҳофаза қилиш ходимларининг фарзандларига нисбатан зўравонлик қилишга чақирган. Фойдаланувчининг шахси аниқланди – у 1989 йилда Москва областида туғилган Владислав Синица бўлиб чиқди. 

Синица 4 август куни ҳибсга олинди ва унга нисбатан Россия Жиноят кодексининг 282-моддаси (Бир гуруҳ шахсларга нисбатан оммавий равишда нафрат уйғотиш) бўйича жиноят иши қўзғатилди. 

Суд Владислав Синицани 3 октябргача ҳибсга олди.  

Синицанинг ўзи унинг сўзлари "контекстдан юлиб олинган"ини таъкидлаб, айбига иқрор бўлмаяпти.

— Менга нисбатан эълон қилинган айбловларни, айниқса ҳуқуқни муҳофаза қилиш органлари ходимларининг яқинларига таҳдид қилганимни қатъий рад этаман. Сўзларим контекстдан юлиб олинган, — деди у.

Владислав Синица Подольск шаҳрида туғилган, Россия молия вазирлиги бутунроссия давлат солиқ академияси битирувчиси. Маълумотларга кўра, у мухолифат акцияларининг доимий қатнашчиларидан ҳисобланади.

Кўпроқ янгиликлар