Британияда круиз лайнери дунё бўйлаб энг узун саёҳатга жўнади

Жаҳон 09:01 / 02.09.2019 9112

1 сентябрда Лондондан 6 та қитъа, 51 давлат ва 112 портни қамраб оладиган 245 кунлик денгиз саёҳатига Viking Sun лайнери жўнади. Бу эса янги Гиннесс рекорди ҳисобланади.

Саёҳатни Viking Ocean Cruises круиз компанияси ташкиллаштирган. Бу ҳақда The Guardian нашри хабар берди. 

Саёҳатга жўнашни истаганлар 25 квадрат метрлик каюта учун 67 минг фунт стерлинг тўлашларига тўғри келган. Энг қимматбаҳо каюта 194 минг фунт стерлинг туради.

Лайнер 930 йўловчига мўлжалланган. Улар ихтиёрида 2 та сув ҳавзаси, қор ғори,  қишки боғ ва спа бўлади. Кемадаги 8 та ресторан эса 245 турдаги таомнома таклиф этади.

Саёҳат Скандинавия, Кариб ҳавзаси, Жанубий Америка, Тинч океанининг жанубий қисми, Австралия ва Осиёни қамраб олади.

Сайёҳлар, шунингдек, 23 та шаҳарда, жумладан Рио-де-Жанейро, Ушуайя, Хобарт, Хо Ши Мин, Мумбай ва Луксорда тунни ўтказишади 

Лондондан бутун саёҳат учун тўловни амалга оширган 54 йўловчи саёҳатга жўнаган. Қолган сайёҳлар кемада саёҳатнинг бир қисмини ўтказадилар.

Кўпроқ янгиликлар