Одил Аҳмедов Республикадаги илк хусусий футбол академиясини очди

Спорт 20:25 / 30.08.2019 24080

Наманган вилоятининг Тўрақўрғон туманида «Одил Аҳмедов футбол академияси» иш бошлади.

Унинг тантанали очилиш маросими чинакам байрамона руҳда ташкил этилди. Маросимда Наманган вилояти ҳокими Хайрулло Бозоров сўзга чиқиб, академия ишига омад тилади.

Футбол академияси талантли ёш спортчиларни Европа тизими асосида тарбиялашни мақсад қилган. Масканда иқтидорларни бугунги дунё футболи даражасидаги ўйинчилар этиб тайёрлаш учун кўҳна қитъанинг етакчи мутахассислари ёрдамида футбол сирлари ўргатилади.

Академия мураббийларига Италия футбол университетининг етакчи мутахассислари ўз тизимлари асосида иш олиб бориш бўйича услубий дастурини тақдим қилишган. Улар болалар билан айнан шу дастур доирасида иш олиб боришмоқда.

Ноябрь ойида футбол академиясига Италия футбол университети директори ва мураббийи Даниэль Андреоцци ташриф буюради. У икки ҳафта давомида дастур бўйича олиб борилаётган ишлар билан танишади.

Сараланган мураббийлар гуруҳи ўзбек футболида маълум ютуқларга эришган футболчилардан ташкил топган. Ўзбекистон ҳудудидаги ёш иқтидорларни кашф қилишни ўз олдига мақсад қилган «Одил Аҳмедов академияси» айни пайтда еттита вилоятда иш олиб бормоқда.  

Академиянинг асосий мақсади – ўзбек футболчиларини жаҳон футболи даражасида тарбиялаб, уларнинг хизматини чет эл клубларига тақдим қилишдир.

Академия октябрь ойида халқаро турнир ва ёш футболчилар ўртасида «Водий лигаси» мусобақасини ўтказишни режалаштирган.  

Очилиш маросимида вилоят ҳокими Хайрулло Бозоров ва Одил Аҳмедов стадион дарвозасидаги рамзий лентани кесиб, дарвозага тўп йўллашди.

Шундан сўнг майдонда «Одил Аҳмедов академияси» мураббийлари ва «Навбаҳор»нинг ўтмиш юлдузларидан ташкил топган жамоалар ўртасида футбол баҳси ўтказилди.

Ота-оналарни, “футбол академиясида ўқитиш пуллик бўладими?”, деган савол қизиқтириши тайин. Бу саволга лойиҳа муаллифларидан бири Нодирҳўжа Юлдашев қуйидагича жавоб берди: “Академияда иккита, “А” ва “Б” таркиб билан машғулотлар олиб борилади. Ҳозирча бизда “А” таркиб бутунлай бепул шуғуланмоқда. Куз ойларида Италия футбол университети мутахассислари келганида, Европа тизимида қандай бўлса, ўша амалиётни қўллаймиз. Хусусан, “Б” таркиб бюджет-шартнома асосида шакллантирилиши кўзда тутилмоқда”. 

Кўпроқ янгиликлар