«Ўзбек футболи анча олдинда» — Тожикистон сардори Ўзбекистонга келиши олдинга қадам бўлганини айтди

Спорт 17:09 / 28.08.2019 11152

Иккинчи даврани Суперлиганинг «Бухоро» жамоасида ўтказаётган Тожикистон миллий жамоаси сардори Фатҳулло Фатҳуллоев «Динамо»га қарши ўйиндан сўнг (3:0) ўзбек ва тожик футболи ўртасидаги фарқни айтди.

«Бугун қийин ўйин ўтказдик. Самарқанд жамоасида кўпчиликни биламан, яхши жамоа. Охирги ўйинда муваффақиятсиз ҳаракат қилаётган «Динамо»ни ютишимиз керак эди.

Олдинги ўйинларда дуранг ўйнаган бўлсак-да, ғалабага муносиб ҳаракат қилгандик. Бугунги ўйиндан олдин мураббий ҳаммамизни йиғиб, фақат ғалаба қозонишимиз кераклигини айтди. Бугун қандай ҳисобда бўлса ҳам енгишимиз шарт эди.

Тожикистон миллий жамоасига чақирилмаганим? 1 йил олдин Филиппинга қарши ўйинда қизил карточка олгандим ва шундан буён миллий жамоа расмий ўйинларда майдонга тушмадим. Шундай бўлса-да, Қирғизистонга қарши ўйинда стадионда бўламан ва йигитларни қўллаб-қувватлайман.

«Бухоро»нинг таклифини ўзбек футболи тожик футболидан юқорироқ бўлганини билган ҳолда қабул қилдим. Бу ерда ҳамма жамоалар курашувчан. Тожикистонда эса фақат 2-3 та жамоа чемпионлик учун курашади. Чемпионатнинг даражаси ҳам яхши ва мен бу ерда жисмоний ҳолатимни яхшилаб оламан деб ўйлайман.

Жаҳон чемпионати саралашидаги гуруҳимизда Япония шубҳасиз, етакчи. Қирғизистон билан гуруҳдан чиқиш учун курашамиз. Уларни яхши биламиз. Бизда ҳозир яхши футболчилар тўпланган», — деб Фатҳуллоевнинг сўзларини келтирмоқда Tribuna.uz мухбири.

Кўпроқ янгиликлар