25 август куни Наманган вилоятининг Уйчи туманида тиббиёт буюмлари ишлаб чиқаришга ихтисослашган “Акс медикал фарм” МЧЖ қўшма корхонаси иш бошлади. Бу ерда йилига 100 миллион дона шприц, 300 минг дона аёллар тиббиёт ойнаси ишлаб чиқариш кўзда тутилган. Бу ҳақда Наманган вилояти ҳокимлиги ахборот хизмати хабар берди. 

Қурилиш ишлари 2018 йил март ойида бошланган “Акс медикал фарм” корхонаси ўз йўналишида ноёб лойиҳа ҳисобланади. Ишлаб чиқариш ҳажми жиҳатидан республикамизда Нукус шприц заводидан кейин иккинчи ўринда туради. 

“Бунёдкор Махсудбек файз” фермер хўжалиги томонидан амалга оширилган ушбу лойиҳанинг умумий қиймати 2 миллион 300 минг АҚШ доллари бўлиб, шундан 630 минг доллари хитойлик сармоядорларнинг тўғридан-тўғри инвестициясидир.

“Акс медикал фарм” корхонасида йиллик ишлаб чиқарилган маҳсулотларнинг умумий қиймати 40 миллиард сўмни ташкил қилади.

Корхона тўла қувватда ишга тушиши билан 100 га яқин маҳаллий ёшларнинг доимий бандлиги таъминланади. 

Маълумот ўрнида, вилоятга жорий йилнинг биринчи ярмида 2017 йилга нисбатан 15 баробардан кўп инвестиция кириб келишига эришилди. (2017 йилда 7,5 миллион АҚШ доллари, 2019 йилнинг дастлабки олти ойида 125 миллион АҚШ доллари). Йил якунида ушбу кўрсаткични 400 миллион АҚШ долларига етказиш режалаштирилмоқда.

Яқинда Наманган туманидаги “Мерримед фарм” корхонасида қиймати 25 миллион АҚШ доллари бўлган, 100 зиёд дори-дармонлар ишлаб чиқаришга мўлжалланган янги линия ишга туширилганди. 

13-14 сентябрь кунлари Наманган шаҳрида тиббиёт ва фармацевтика соҳасида яна бир йирик халқаро инвестицион форум ташкил этилмоқда. “XXI аср тиббиёт ва фармацевтикаси ривожида инвестициялар ва инновацияларнинг ўрни ва роли” деб номланган ушбу форумда дунёнинг кўплаб мамлакатларидан тиббиёт ва фармацевтика соҳасида бизнес юритаётган ишбилармонлар ва инвесторлар иштирок этади.