Украиналик интернет фойдаланувчиларни мамлакат президенти Владимир Зеленскийнинг узун кортежи аччиқлантирди. Улкан кортежнинг ўтиши учун йўлдаги қатнов тўсилган.

Кортеж видеоси vnebo.com.ua сайтининг You-Tube-каналида жойлаштирилган.

Видеода Зеленский Исроил бош вазири Биньямин Нетаньяху билан Бабий Ярдан қайтаётгани тасвирлаган. Сиёсатчиларнинг автомобилларига 20 дан кўпроқ машина ҳамроҳлик қилган.

Фойдаланувчилардан бири киноя қилиб, “Мана сизга халқ хизматкорингиз, бутун қиёфаси билан”, деб ёзган. “Велосипед қани?”, деб заҳархандалик қилган яна бир фойдаланувчи. “Эҳтимол, барча украин кортежларидан энг каттаси бўлса керак”, деб қўшимча қилган яна бир фойдаланувчи.

Аммо Зеленский билан бирга Нетаньяху бўлганини эслатиб, президентнинг ёнини олганлар ҳам бўлган. “Бу нормал ҳолат, меҳмон келди, уни қўриқлаш керак-ку”, “Ҳаммаси юқори мартабали меҳмонларни кутиб олишдаги баённома бўйича”, деб билдирилган изоҳлар ҳам бўлган.

Зеленский март ойида президентлик пойгаси давомида сайловларда ғолиб бўлса, тансоқчилари маъқулламаса-да, ишга велосипедда боришга тайёрлигини айтганди. 

Июлда эса Украина президенти ишга велосипедда бормаслигини “у ҳам барча каби ҳаракат иштирокчиси” экани билан тушунтирган. 

Зеленскийнинг таъкидлашича, унинг ҳаракатланиши вақтида 2-3 та автомобил юради. Машиналардан бирида президент, иккинчисида тансоқчилар, учинчисида эса президент жамоаси аъзолари ва ҳамроҳ шахслар кетади. “Бу автомобиллар барча светофорларда тўхтайди, тирбандликларда туради, “мигалка”ларни ёқмайди”, деб айтганди Зеленский.