Ҳукумат қарори: Наманганда болаларни мактабгача таълимга қамраб олиш кучайтирилади

Ўзбекистон 11:17 / 21.08.2019 2443

Вазирлар Маҳкамасининг “Наманган вилоятида мактабгача таълим ташкилотларининг моддий-техник базасини мустаҳкамлаш ва болаларни мактабгача таълимга қамраб олишни кучайтириш чора-тадбирлари тўғрисида”ги қарори қабул қилинди.

Ҳужжат билан Наманган вилояти ҳокимлиги томонидан Ўзбекистон Республикаси Мактабгача таълим вазирлиги, Иқтисодиёт ва саноат вазирлиги, Инвестициялар ва ташқи савдо вазирлиги билан биргаликда ишлаб чиқилган 2020-2022 йилларда Наманган вилоятида мактабгача таълим ташкилоти мавжуд бўлмаган маҳалла фуқаролар йиғинларида ташкил этиладиган давлат мактабгача таълим ташкилотларини қуришнинг асосий параметрлари тасдиқланди.

Белгиланишича, мазкур маҳалла фуқаролар йиғинларида ташкил этиладиган давлат мактабгача таълим ташкилотларида болалар таъминоти учун ота-оналар бадал пули ташкилот фаолияти йўлга қўйилган кундан бошлаб 5 йил давомида 50 фоиз миқдорида ўрнатилади.

Ўзбекистон Республикаси Иқтисодиёт ва саноат вазирлиги Инвестициялар ва ташқи савдо вазирлиги, Мактабгача таълим вазирлиги ҳамда манфаатдор вазирликлар ва идоралар билан биргаликда тасдиқланган лойиҳа-смета ҳужжатларига асосан Ўзбекистон Республикаси Инвестиция дастурининг 2020 йил ва кейинги йиллар учун параметрларини шакллантиришда мазкур қарор билан тасдиқланган мактабгача таълим ташкилотлари қурилишини белгиланган тартибда киритилишини таъминлайдилар.

Ўзбекистон Республикаси Молия вазирлиги Ўзбекистон Республикасининг 2020 йил ва кейинги йиллар учун бюджет параметрларини шакллантиришда ушбу қарорда белгиланган мактабгача таълим ташкилотлари таъминоти учун зарур маблағларни ажратилишини назарда тутади.

Белгилаб қўйилишича:

давлат мактабгача таълим ташкилотларини қуриш энергия самарадорлиги ва энергия тежамкорлиги стандартларини қўллаган ҳолда, қатъий намунавий лойиҳага асосланади;

ташқи муҳандислик алоқа тармоқлари ва ички автомобиль йўллари, бунёд этилаётган объектлар ҳудудидан ўтувчи сув таъминоти ва оқава сув тармоқлари қурилиши Наманган вилояти ҳокимлиги маҳаллий бюджети маблағлари ҳисобидан амалга оширилади.

Мактабгача таълим ташкилотларининг бино ва иншоотларини қуриш бўйича:

Ўзбекистон Республикаси Мактабгача таълим вазирлиги ҳузуридаги “Инфратузилмани ривожлантириш инжиниринг компанияси” давлат унитар корхонаси - буюртмачи этиб белгиланди;

бош лойиҳа ва бош пудратчи ташкилот белгиланган тартибда тендер (танлов) натижасида аниқланади.

Ўзбекистон Республикаси Қурилиш вазирлиги белгиланган тартибда лойиҳа-смета ҳужжатларини давлат экспертизасидан ўтказади ва қурилиш-монтаж ишларининг сифати устидан давлат архитектура-қурилиш назоратини ўрнатади.

Кўпроқ янгиликлар