Kun.uz сайтида жорий йилнинг 11 февраль куни «Пахтачидаги абгор йўл ёхуд Самарқанд вилояти автомобиль йўллари ҳудудий бош бошқармасининг «ажойиб» хати» сарлавҳали танқидий мақола эълон қилинган эди.
Унда Пахтачи туманидаги «Сардоба» ва «Қувондиқ» маҳаллалари орасидан ўтган ички йўлнинг абгор ҳолати, ёзда чанг, ёғингарчилик кунлари лой ва балчиққа айланиши, бу эса аҳоли ва автомобиллар қатновига ноқулайлик туғдираётганлиги, айниқса, шу йўлдан дарсга қайтаётган мактаб ўқувчилари қийналаётганлиги ёритилган эди.
Ушбу танқидий мақоладан сўнг Самарқанд вилояти автомобиль йўллари ҳудудий бош бошқармаси бошлиғи Қ.Ҳасанов мазкур мақолада келтирилган муаммоларни бартараф этиш бўйича кўрилаётган чора-тадбирлар юзасидан Пахтачи туманидаги 4К562 «М-37 автомобиль йўлидан Султонобод-Абдиамин» маҳаллий йўлини таъмирлаш ишлари 2019 йил 12 февралда бошланиши ҳақида таҳририятга маълумот берганди.
Бошқарма томонидан тақдим этилган маълумотни жойида ўрганганимизда ҳақиқатан ҳам йўлни таъмирлаш ишлари бошланганлигига гувоҳ бўлгандик.
Бошқарма бошлиғи Қ.Ҳасанов имзоси билан аҳоли мурожаатларига йўллаган жавобларида «Қувондиқ» маҳалласи ҳудудида жойлашган умумфойдаланувдаги йўлни таъмирлаш 2019 йил I чорагида жорий таъмирлаш маблағлари ҳисобидан Пахтачи ТЙФУК томонидан таъмирланиши билдирилган.
Ўрганишимиз давомида Қ.Ҳасанов ушбу йўл таъмирини белгиланган муддатларда якунига етказишга ваъда берганди. Аммо бу ваъда бажарилмай қолди.
Ушбу масала юзасидан маҳалла аҳолиси таҳририятга такрорий мурожаат йўллади.
Мурожаатни ўрганиш давомида маълум бўлишича, айни вақтда йўлнинг бир қисми таъмирланган, бироқ якунига етмай қолиб кетган. Асфальт учун тайёрлаб қўйилган кўчадан кўтарилган чанг аҳоли учун ноқулайликлар туғдирмоқда. Айниқса, аллергик касалликлари бор бўлган фуқаролар бундан азият чекмоқда. Бир неча ойдан буён йўл таъмири тўхтаб қолган.
Аҳолининг кўплаб мурожаатлари асосида ушбу масала юзасидан Самарқанд вилояти автомобиль йўллари ҳудудий бош бошқармаси масъуллари билан бир неча марта боғландик. Ҳар сафар таъмир ишлари давом этишини ваъда қилган масъуллар ваъдасини бажармай келмоқда.
Дастлабки ўрганишимизда мактаб ўқувчилари бу йўлдан ёғингарчилик кунларида дарсга қатнашга қийналаётганлигини алоҳида таъкидлаган эдик.
Бош бошқарма мутасаддилари масъулиятни ҳис қилмай, ўз ваъдаларини бажаришмаса, бу йил ҳам мазкур ҳолат такрорланадиган кўринади.
Kun.uz Самарқанд вилояти автомобиль йўллари ҳудудий бош бошқармаси аҳолини қийнаётган ушбу муаммога жиддий эътибор қаратиб, ижобий ҳал этишига ишонч билдиради.
Бардошбек САМАД ўғли,
Kun.uz мухбири.
