Шомуродов голини «Пахтакор-79» хотирасига бағишлади, Карпин уни қанча нархга қўйиб юборишга тайёрлигини айтди

Спорт 08:51 / 13.08.2019 67137

Россия Премьер-лигасининг 5-турида «Ростов» «Крилья Советов»ни қабул қилиб, 1:0 ҳисобида устун келди. Ғалаба голига 33-дақиқада Элдор Шомуродов муаллифлик қилди.

Бу ғалаба билан ростовликлар мусобақа жадвалида 2-ўринга кўтарилган бўлса, жамоанинг ўзбекистонлик ҳужумчиси тўпурарлар рўйхатида Артём Дзюба («Зенит») ва Александр Соболевга («Крилья Советов») етиб олди. Тўртала голини ҳам ўйиндан киритган Элдор битта голини пенальтидан урган рақибларидан олдинда бормоқда.

Шомуродов ўйиндан кейинги интервьюсида голини «Пахтакор-79» хотирасига бағишлаганини айтди.

«Менга барча голларим ёқади, айниқса, жамоам ғалаба қозонганда. Шунинг учун, «Крилья» дарвозасига урган голим ҳам аҳамиятли.

Гол урилган вазиятда Ионов ажойиб ҳаракат қилди – тўпни яхши узатди. Хорик Байрамян тўпни менга ўтказиб юборди, мен эса оёғимни қўйишга улгурдим. Мен учун гол уриш жуда муҳим. Мен ҳужумчиман, гол уриш – менинг ишим.

Голни «Пахтакор-79» хотирасига бағишлайман», – дея Элдорнинг сўзларини келтирди «Матч ТВ». 

Image
Фото: Чемпионат.com

Россия чемпионатининг янги мавсуми кашфиётларидан бири сифатида кўрилаётган 24 ёшли ҳужумчига эндиликда «Галатасарой» ҳам бефарқ эмаслиги маълум бўлди.

Футбол шарҳловчиси Нобель Арустамяннинг хабар беришича, Истанбул клуби скаутлари «Ростов»-«Крилья Советов» ўйини пайтида мезбонлар ҳужумчиси Элдор Шомуродов ва РПЛда порлаётган бошқа бир кашфиёт – «Крилья Советов» ҳужумчиси Александр Соболевни кузатишган.

«Ҳамкасбларим эфир пайтида Ростовга Туркиядан скаутлар келганини айтишди, аммо айнан қайси футболчиларни кузатгани келишганини аниқлаб беришмади. Қўшимча қиламан, «Галатасарой» скаутлари Соболев ва Шомуродовни кузатишган. Аммо турклар ҳозир ўзбекистонлик ҳужумчини сотиб олишолмайди, чунки Элдорнинг нархи жуда қиммат. «Ростов» ҳужумчисини сотмоқчи эмас», – деб ёзди Арустамян «твиттер»да.

Бундан олдин 14-рақам эгаси Москванинг ЦСКА жамоаси эътиборига тушгани, ҳарбийлар клуби уни Фёдор Чаловга ўринбосар сифатида кўраётгани хабар қилинган эди.

Image
Фото: Valery Matytsin/TASS

Бироқ, Шомуродовнинг агенти Қаҳҳор Мўминовнинг сўзларига кўра, Элдор рус клубларига ўтмоқчи эмас.

«ЦСКА – Россиянинг энг обрўли жамоаларидан, лекин биз РПЛ клублари таклифларини кўриб чиқмасликка келишиб олганмиз. У ўзини Европада синаб кўрмоқчи.

Бундай таклифлар бор. Аммо биз «Ростов»ни ҳурмат қилган ҳолда трансфер шартлари ва вақти бўйича қарорни улар қабул қилишлари керак, деб ҳисоблаймиз», – деганди агент «Спорт-Экспресс» мухбири билан суҳбатда.

Ўз навбатида Элдорнинг ўзи «Матч ТВ»га берган интервьюсида Европанинг кучли бешлик чемпионатларида ўйнаш орзусида эканини айтган, лекин ҳозирги жамоаси билан 4 йиллик шартномаси борлиги, кетиш ҳақида ўйламаётганини қўшимча қилган.

Фото: "Ростов" ФК

«Крилья Советов» билан учрашувдан кейин «Ростов» бош мураббийи Валерий Карпин клуб бу йил ёзда ҳеч қайси футболчисини сотмоқчи эмаслигини таъкидлади.

«Қайсидир футболчимизни йўқотишимиз мумкинлигидан хавотирда эмасмиз. Ҳеч кимни сотмоқчимаслигимиз ҳақида айтганмиз. Лекин бордию 50 миллион таклиф қилишса, ўзим у ўйинчини ўша клубга олиб бориб қўяман», – деди Карпин «Матч Премьер» телеканали эфирида.

Юқорида қайд этилганидек, «сариқ-кўклар» 5-турдан кейин 11 очко билан турнир жадвалида 2-ўринни эгаллаб туришибди. Пешқадам «Зенит» ҳисобида 13 очко бор. «Ростов»ни август ойида чемпионат доирасида «Уфа», «Рубин» ва «Локомотив»га қарши баҳслар кутмоқда.

 

Кўпроқ янгиликлар