Bo‘rijarda qarmoqqa ilingan jasad bo‘yicha rasmiy ma'lumot berildi

Toshkent shahri IIBB matbuot xizmati poytaxt markazidan oqib o‘tuvchi Katta Bo‘rijar kanalidan topilgan jasad bo‘yicha ma'lumot berdi.

«5 avgust kuni soat 10:40da 102 raqamiga Bo‘rijar kanalida baliq ovlayotgan, 31 yoshli Bobur R. tomonidan qo‘ng‘iroq kelib tushgan. U o‘z xabarida Chilonzor tumani hududidan oqib o‘tuvchi Bo‘rijar kanalida inson jasadini ko‘rganini bildirgan.

FVV qutqaruvchilari tomonidan jasad suvdan chiqarib olingan. Ma'lum bo‘lishicha, u Shayxontohur tumanida yashagan, 27 yoshli A.M. bo‘lgan va u joriy yilning 1 avgustida bedarak yo‘qolgan shaxs sifatida qidiruvga berilgan.

Tergov oldi harakatlari olib borilmoqda», deyiladi xabarda.

5 avgust kuni Kun.uz sayti muxbirlari tomonidan mazkur hodisa bo‘yicha lavha tayyorlangan va «Toshkentda baliqchi qarmog‘iga inson jasadi ilindi. U qotillik qurboni bo‘lishi ham mumkin» sarlavhali maqola e'lon qilingan edi.