O‘zbekiston Respublikasi Xalq ta'limi vazirligi bolalarni maktabga qabul jarayonini yanada takomillashtirish, jumladan ixtiyoriy pullik to‘lovni butunlay bekor qilish bo‘yicha takliflar ko‘zda tutilgan «Vazirlar Mahkamasining 2019 yil 7 iyundagi 469-son qarori bilan tasdiqlangan Bolalarni davlat umumiy o‘rta ta'lim muassasalariga qabul qilish bo‘yicha davlat xizmatlari ko‘rsatishning ma'muriy reglamentiga o‘zgartirish va qo‘shimchalar kiritish to‘g‘risida»gi qonun loyihasini muhokamaga qo‘ydi.

«Xabaringiz bor, Vazirlar Mahkamasining 2019 yil 7 iyundagi qarori bilan «Bolalarni davlat umumiy o‘rta ta'lim muassasalariga qabul qilish bo‘yicha davlat xizmatlari ko‘rsatishning ma'muriy reglamenti» tasdiqlangan. Ma'muriy reglament ijtimoiy tarmoqlar, ommaviy axborot vositalari, internet tarmog‘i hamda jamoatchilik orasida qizg‘in muhokamalarga sabab bo‘ldi.

Ushbu ma'muriy reglamentga muvofiq, joriy yilning 21 iyunidan boshlab, Toshkent shahrining 81ta umumiy o‘rta ta'lim maktablarining 1-sinfiga bolalarni davlat xizmatlari markazi orqali qabul qilish jarayonlari boshlandi. Shu kunga qadar (20.07.2019 y) 3330 nafar bola biriktirilgan mikrohudud doirasida ushbu 81ta davlat umumta'lim maktablariga tegishli yo‘llanmalar asosida korrupsiyasiz qabul qilindi.

Ta'kidlash joiz, ayni vaqtda bolalarni maktabga qabul qilishning yangicha, zamonaviy, shaffof, aholiga qulay bo‘lgan, eng muhimi, korrupsiya holatlari oldini olishga qaratilgan tizim joriy etilmoqda. Uning afzalliklari haqida Xalq ta'limi vazirligining rasmiy veb-saytida, feysbuk sahifalarida hamda boshqa ommaviy axborot vositalari orqali targ‘ibot va tushuntirishlar berib borilmoqda. Shu bilan birga, ijtimoiy tarmoqlarda ma'muriy reglamentni o‘zgartirish yuzasidan ko‘plab taklif va mulohazalar bildirilmoqda.

Mazkur takliflar asosida Xalq ta'limi vazirligi Adliya vazirligi bilan birgalikda ma'muriy reglamentga o‘zgartirish kiritish to‘g‘risida qaror loyihasini tayyorladi. Ushbu loyiha keng jamoatchilik muhokamasiga qo‘yilmoqda. Loyihaga faol munosabatingizni bildirishingizni so‘raymiz.

Ma'muriy reglamentga quyidagi o‘zgartirish va qo‘shimchalar kiritish nazarda tutilmoqda.

Qo‘shimcha kvota quyidagilarga ajratilishi belgilanmoqda:

1) mikrohududda doimiy propiska asosida yashayotgan fuqarolarning tegishli yilning 1 sentyabriga qadar 6 yoshga to‘ladigan bolalariga;

2) umumiy o‘rta ta'lim muassasasida faoliyat yurituvchi pedagog va xodimlar farzandlariga;

3) akasi yoki opasi mazkur umumiy o‘rta ta'lim muassasasida ta'lim olayotgan oilalarning maktab yoshiga yetgan farzandlariga;

4) umumiy o‘rta ta'lim muassasalariga biriktirilgan mikrohududda istiqomat qilayotgan harbiy xizmatchilarning farzandlariga.

Eslatib o‘tamiz, amaldagi ma'muriy reglamentda ota-onalarning ixtiyoriy roziligi asosida eng kam ish haqining 10 baravari miqdorida to‘lovni amalga oshirganidan so‘ng quyidagilar uchun qo‘shimcha kvota ajratilishi belgilangan:

a) mikrohududdan tashqarida istiqomat qilayotgan maktab yoshidagi bolalar;

b) mikrohudud va mikrohududdan tashqari maktab yoshiga yetmagan, ya'ni tegishli yilning 1 yanvaridan 31 avgustiga qadar 7 yoshga to‘lmaydigan bolalar;

v) umumta'lim muassasalarida (mikrohudud va mikrohududdan tashqari) ta'lim berish tili bo‘yicha boshlang‘ich bilim (muloqot qilish) ko‘nikmasiga ega bo‘lmagan bolalar uchun ariza beruvchilarning ixtiyoriy roziligi asosida yig‘im undiriladi.

Bundan tashqari, ko‘rsatilayotgan davlat xizmatlari uchun to‘lov miqdori hamda qo‘shimcha kvota bo‘yicha ota-onalarning ixtiyoriy roziligi hamda Kuzatuv kengashi tomonidan belgilanadigan to‘lov bekor qilinmoqda.

Qo‘shimcha kvota asosida ota-onalarning ixtiyoriy roziligi bilan pullik to‘lov orqali maktabga joylashtirish tartibi bekor qilinmoqda. Ya'ni bu o‘zgartirishlar kuchga kirsa, qo‘shimcha bir martalik to‘lov orqali mikrohududidan tashqaridan o‘quvchini joylashtirish imkoniyati umuman yo‘q bo‘ladi.

Qo‘shimcha kvota yuqorida ta'kidlangan toifadagi shaxslar uchun belgilanmoqda.

Qaror loyihasi bo‘yicha jamoatchilik muhokamasi joriy yilning 5 avgustga qadar davom etadi», deyiladi Xalq ta'limi matbuot xizmati xabarida.