Iyun oxiridan, uzoq yillar davomida birinchi marta Qozog‘iston O‘zbekistonga elektr energiya eksport qila boshladi. Bu haqda bir qator OAV xabar berdi.   

Ikki davlatning mutasaddi tashkilotlari o‘rtasida tuzilgan bitimga ko‘ra, 2019 yil davomida O‘zbekiston energetika tizimiga 1 mlrd kVt-soatdan ko‘proq elektr energiya eksport qilinadi.

Qozog‘iston energetika vazirligi ma'lumotlariga ko‘ra, O‘zbekistonga elektr energiya eksportini amalga oshirishning eng muhim shartlaridan biri Qozog‘istonning ichki ehtiyojini ta'minlash  hisoblanadi. Qozog‘istonlik iste'molchilarni elektr ta'minoti bilan uzluksiz va ishonchli ta'minlash uchun avariyaga qarshi avtomatikani sozlash bo‘yicha tadbirlar majmuasi va texnologik qoidabuzarliklar vaziyatida o‘zbekistonlik iste'molchilar uchun cheklovlar kiritish ko‘zda tutilgan.

Elektr energiya yetkazilishi boshlangan va iyun oxiridan 17 iyulgacha O‘zbekistonga 145 mln kVt-soat elektr energiya eksport qilingan. 

Ta'kidlanishicha, Qozog‘iston elektr energiyasini yetkazishi Qozog‘istondagi elektr stansiyalarni modernizatsiyalash, rekonstruksiyalash va kengaytirish hisobiga elektr quvvatlaridagi profitsit evaziga mumkin bo‘lgan.