Қозоғистон маданият вазирлиги лотин имлосига ўтиш кечиктирилиши ҳақидаги хабарларни тасдиқламади

Жаҳон 01:00 / 17.07.2019 2249

Қозоғистон Республикаси Маданият вазирлиги Россия оммавий ахборот воситалари орқали тарқатилган Қозоғистонда лотин имлосига ўтиш гўёки 10 йилга кечиктирилгани ҳақидаги хабарларни рад этди, деб хабар бермоқда informburo.kz.  

«Лотин имлосига ўтиш 2030–2035 йилларгача узайтирилиши тўғрисидаги хабарлар ҳақиқатга тўғри келмайди. Қозоғистон Республикасининг биринчи президенти — Элбоши Нурсултон Назарбоевнинг «Қозоқ тили алифбосини кирилл имлосидан лотин имлосига ўтказиш тўғрисида»ги фармонига мувофиқ, Қозоғистон Республикаси Ҳукумати томонидан 2025 йилга қадар босқичма-босқич ўтиш бўйича тадбирлар режаси тасдиқланган», — деган Қозоғистон Республикаси маданият ва спорт вазирлигининг тил бўйича сиёсат қўмитаси раиси Ғалимжон Мелдешов.

Унинг эслатишича, ўтиш уч босқичдан иборат бўлади ва уларнинг ҳар бирида ҳаракатлар аниқ белгилаб қўйилган:

  • 2018–2020 йилларда — норматив-ҳуқуқий ҳужжатларни такомиллаштириш бўйича ишлар олиб бориш, янги алифбода имло қоидаларини ҳамда матнларни лотин имлосига ўгирувчи IT-илова ишлаб чиқиш;
  • 2021–2023 йиллар — давлат ва маҳаллий ижроия органлари томонидан қабул қилинган амалдаги норматив-ҳуқуқий ҳужжатларни лотин имлосига ўтказиш, паспорт, гувоҳнома ва бошқа ҳужжатларни бериш;
  • 2024–2025 йиллар — марказий давлат органлари ҳамда маҳаллий ижроия органларининг иш юритувини, давлат ОАВлари, шунингдек, таълим муассасаларини лотин имлосига ўтказиш.

Айни пайтда Қозоғистонда 2020–2025 йиллар мобайнида тилларни ривожлантириш ва амалда бўлиши бўйича давлат дастури ишлаб чиқилмоқда. Унинг асосий вазифаси лотин имлосига асосланган қозоқ алифбосини модернизация қилишдан иборат бўлади.

«Шу сабаб билан бутун ишлар тасдиқланган тадбирлар режасига кўра олиб борилмоқда», — деди вазирлик вакили.

Эслатиб ўтамиз, «Известия», «Комсомольская правда» каби рус пропагандасига ихтисослашган нашрларда номи ишкор қилинмаган дипломатик манбаларга асосланиб, Қозоғистон ҳукумати алифбони ўзгартиришни яна 10 йилга — 2035 йилгача кечиктириш имкониятини кўриб чиқаётгани ҳақидаги хабар эълон қилинган эди.

Кўпроқ янгиликлар