Ўзбекистонда биринчи марта электр станцияларни бошқариш хусусий секторга топширилади

Ўзбекистон 14:30 / 12.07.2019 9819

Ўзбекистон Қозоғистоннинг «Горные работы» компанияси ишончли бошқарувига иккита иссиқлик электр станциясини топширади.

Бу ҳақда Ахборот ва оммавий коммуникациялар агентлигида ўтказилган брифингда «Иссиқлик электр станциялари» АЖ бошқаруви раиси Руслан Мубаракшин хабар берди.

Ҳозирги пайтда Ангрен ва Янги Ангрен ИЭСни уч йилга ишончли бошқарувга топшириш бўйича келишув тафсилотлари ишлаб чиқилмоқда. Ушбу ҳужжатда табиий газдан фойдаланишни максимал қисқартириш ва кўмир ёқиш улушини кўпайтириш назарда тутилган.

«Ўзбекистонда биринчи марта электр станциясини бошқариш хусусий шахсларга топширилади. Асосий вазифа - ИЭСни табиий газдан озод қилиш», - деди Руслан Мубаракшин.

Унинг қўшимча қилишича, Қозоғистондаги йирик кўмир конлари эгаси бўлган «Горные работы» компанияси билан Ўзбекистонга кўмир етказиб бериш масаласи муҳокама қилинмоқда.

«Паст нархларга эришиш учун музокаралар олиб борамиз. Кўмир импорти электр энергияси таннархига таъсир қилмаслиги ҳамда истеъмолчилар учун тарифларнинг ошишига олиб келмаслиги керак. Етказиб бериш ишлари Ангрен кўмир кони тўлиқ ишга туширилгунга қадар амалга оширилади», - деди компания раҳбари.

Шунингдек, унинг қайд этишича, Ўзбекистонда кўмирнинг жуда катта захиралари мавжуд.

Кўпроқ янгиликлар