Электр энергиясини базавий нормалар бўйича ҳисоб-китоб қилиш шу йил якунигача бутун Тошкент шаҳри бўйлаб жорий қилинади 

Ўзбекистон 07:49 / 12.07.2019 5739

Аҳолига етказиб берилган электр энергиясини белгиланган базавий нормалар бўйича ҳисоб-китоб қилиш шу йил якунигача Тошкент шаҳрида жорий қилинади. Бу ҳақда энергетика вазири Алишер Султонов хабар берди, деб ёзмоқда ЎзА.

Эслатиб ўтамиз, шу йил январидан Тошкент шаҳрининг Юнусобод туманида аҳолига етказиб берилган электр энергиясини белгиланган базавий нормалар бўйича ҳисоб-китоб қилиш ишлари амалиётга жорий қилинган эди. 

“Эксперимент натижаларини рақамларда кўрсатадиган бўлсак, жорий йил январь ойида 85 минг 870 нафар истеъмолчидан 72 минг 115 таси (84%) 300 кВт.соатгача (ўртача 1 хонадонга 90,3 кВт.с) электр энергиясини истеъмол қилган ва қолган 13 минг 755 та(16%) истеъмолчи 300 кВт.соатдан кўп (ўртача 1 хонадонга 859,1 кВт.с) электр энергиясини сарфлаган.

Июнь ойида 86 минг 272 нафар истеъмолчидан 74 минг 239 таси (86,1%) 300 кВт.соатгача (ўртача 1 хонадонга 98,8 кВт.с) электр энергиясини истеъмол қилган ва қолган 12 033 та (13,9%) истеъмолчи 300 кВт.соатдан кўп (ўртача 1 хонадонга 1082,8 кВт.с) электр энергиясини сарфлаган.

Энди июнь ойи таҳлили бўйича 300 кВт.соатгача электр энергиясини истеъмол қилувчи истеъмолчилар улуши 84 фоиздан 86,1 фоизга етиб (2,1% ошган), 300 кВт.соатдан кўп электр энергиясини истеъмол қилувчи истеъмолчилар улуши 16% дан 13,9 фоизга тушганини кўрамиз (2,1% камайган). Бунда пул тушуми 60 фоизга ошиб, йўқотишлар кескин камайган. Тажриба ўзини оқлагани учун шу йил якунигача Тошкент, қисман Самарқанд, Бухоро ва Жиззах шаҳарларида мазкур тизим жорий қилиниши кўзда тутилмоқда”, - деди Алишер Султонов.

Кўпроқ янгиликлар