Эроннинг 5 та катери Британияга қарашли танкерни таъқиб қилди

Жаҳон 07:45 / 11.07.2019 11662

Эрон Ислом инқилоби соқчилари корпусининг 5 та қуролланган катери Британияга қарашли нефть танкерини таъқиб қилиб, уни тўхтатишга ҳаракат қилди. Бу ҳақда АҚШ маъмуриятидаги манбаларга иқтибос келтирган ҳолда CNN телеканали хабар берди. 

Воқеа танкер Форс кўрфазини тарк этаётганда юз берган. Эрон кемалари кемага яқинлашиб, унинг экипажидан йўналишни ўзгартиришни ва Эрон сув ҳудудларида тўхташни талаб қилган. Танкерни Британия қироллик флотининг “Монтроуз” фрегати кузатиб борган. Фрегат экипажи катерларга қурол йўналтириб, танкерни ўтказиб юборишни буюрган. Эронлик денгизчилар бўйсунишга мажбур бўлганлар.

АҚШда ушбу ҳодисанинг самолёт бортидан олинган видеоёзуви борлиги тааъкидланмоқда. Видео таъқиб вақтида кўрфаз устидан учиб ўтаётган самолёт бортидан олинган. Бироқ АҚШ томони ушбу видеоёзувни ҳали тақдим қилмаган.

АҚШ қуролли кучлари марказий қўмондонлигининг расмий вакили, биринчи рангдаги капитан Билл Урбан Пентагон ушбу воқеадан хабардорлигини тасдиқлаган.

9 июлда Эрон Гибралтарда Grace 1 кемаси қўлга олингани учун Британияга жавоб беришга ваъда берганди. Танкер 4 июлда Эрондан Суриядаги нефтни қайта ишлаш заводига 2 млн баррел нефт олиб кетаётганда ушлаб олинган. 

Испания ташқи ишлар вазирлиги маълумотларига кўра, британияликлар танкерни АҚШ илтимосига кўра ушлашган.  

Кўпроқ янгиликлар