Luis Enrike Ispaniya milliy jamoasi bosh murabbiyi lavozimini tark etdi.

49 yoshli mutaxassis oxirgi uchta o‘yinda oilaviy sabablar tufayli qatnasha olmagan, bu uchrashuvlarga jamoani uning yordamchisi Robert Moreno tayyorlagan edi.

Ispaniya futbol federatsiyasi rasmiy saytiga ko‘ra, bugun Moreno bosh murabbiy etib tasdiqlangan.

«Qizil furiya» Robertning qo‘l ostida Yevro-2020 saralashining Malta (2:0), Farer orollari (4:1) va Shvetsiyaga (3:0) qarshi o‘yinlarida g‘alaba qozondi.

41 yoshli Moreno bunga qadar «Roma», «Selta» va «Barselona» klublarida ham Enrikega assistent bo‘lib ishlagan.

Eslatib o‘tamiz, Luis Enrike JCh-2018dan keyin Ispaniya milliy jamoasi boshqaruviga kelgan edi.