Toshkent shahridagi Turin politexnika universiteti Mexatronika markazi robototexnikaga qiziquvchi maktab o‘quvchilarini joriy yilning 17 iyunidan boshlanadigan bepul Summer Camp o‘quv kursiga taklif etadi. Bu haqda o‘quv kursi tashkilotchilari Kun.uz'ga ma'lum qilishdi.
Ta'kidlanishicha, mashg‘ulotlarga 14 yoshdan oshgan hamda fizika va matematika bo‘yicha yaxshi bilimga ega bo‘lgan maktab o‘quvchilari tanlov asosida qabul qilinadi.

«Robototexnika kursi universitet mexatronika markazida olib boriladi va o‘quvchilarga dasturlash va modellashtirish bo‘yicha mutaxassislar tomonidan darslar o‘tiladi», —  deyiladi axborotda.

Robototexnika kursida ishtirok etishni istagan o‘quvchilar 15 iyunga qadar Toshkent shahridagi Turin politexnika universiteti mexatronika markaziga kelib ro‘yxatdan o‘tishlari kerak.