Tribuna.uz: Умид Аҳмаджоновнинг ўрнини Равшан Эрматов эгаллаши кутилмоқда

Спорт 15:20 / 13.06.2019 23148

ФИФА рефереси Равшан Эрматов бугун истеъфога чиққан Умид Аҳмаджонов ўрнига ЎФА вице-президенти лавозимини эгаллаши кутилмоқда. Бу ҳақда Tribuna.uz манбалари хабар бермоқда.

ЎФА фаолиятини назорат қилувчи бу лавозимга аввалроқ Миржалол Қосимов ҳамда Сакен Полатовнинг ҳам номзоди кўриб чиқилаётганди, лекин расмийлар катта эҳтимол билан Равшан Эрматов номзодига тўхталишган.

Tribuna.uz манбаларига кўра, ЎФАда яна кўплаб истеъфолар кутилмоқда. Масалан, катта эҳтимол билан ЎФА бош котиби Сардор Раҳматуллаев ҳам лавозимини тарк этади. Шунингдек ПФЛ раҳбариятида ҳам ўзгаришлар бўлиши мумкин.

Маълумот учун, айни вақтда ЎФА президенти — Очилбой Раматов ҳисобланади, лекин ташкилотда асосий ишни биринчи вице-президент бажаради.

Умид Аҳмаджонов 2017 йил 12 сентябрь куни у вақтда ЎФФ деб аталган футбол иттифоқи раҳбарлигига сайланганди. Кейинчалик у ташкилот номини ўзгартирди ва ўзбек футболида турли революцион ўзгаришлар қилишга интилди. ЎФАдаги икки йиллик фаолияти давомида Аҳмаджонов доимий танқидлар остида ишлаб келди. 15 май куни Аҳмаджонов МОҚ президентлигидан ҳам кетганди.

Кўпроқ янгиликлар