«Сен энди «Реал»дасан». Йович Мадридга таништирилди

Спорт 18:00 / 12.06.2019 10603

«Сантьяго Бернабеу» стадионида «Реал»нинг янги ҳужумчиси Лука Йовичнинг таништирув маросими бўлиб ўтди.

Футболчи тиббий кўрикдан ўтганидан сўнг, томонлар ўртасида 6 йиллик битим имзоланди.

Таништирув маросимидан кейин 21 ёшли ҳужумчи стадионга чиқиб, минглаб мухлислар билан билан саломлашди, уларнинг қаршисида тўп билан ишлаш маҳоратини кўрсатди ва фотосессияда қатнашди.

Йович «Реал» рамзини ўпди.

«Мен дунёдаги энг бахтли йигитман, чунки улуғвор клуб билан шартнома туздим.

«Реал»га совринлар ютишда ёрдамлашиш учун қўлимдан келган барча ишни қиламан. Тўғри танлов қилганимга ишончим комил», – деди Йович. 

Маросимда мадридликлар клуби президенти Флорентино Перес ҳам иштирок этди.

«Янги лойиҳа янги мавсумдан старт олади. Биз биламизки, яхши ишлашимиз керак, чунки сўнгги натижалар кутилганидек бўлмади. Биз бунга керакли реакция беришимиз керак, бор кучимиз ва талантимиз билан.

Клубимиз ҳеч қачон таслим бўлмайди, биз буни амалда кўрсатамиз. Чемпионлар лигасининг сўнгги беш мавсумидан тўрттасида ғолиб бўлиш – ҳайратомуз натижа, бу катта жасорат, буни вақт ўтиб барча англайди. Энди биз ғалабали йўлга қайтишимиз керак.

Европа топ-клублари Йович билан шартнома имзолаш учун кураш олиб боришди, аммо бугун у «Реал» футболчиси. У шу клубда ўйнашни орзу қиларди.

Лука, энди сен «Реал» футболчисисан, бу Европанинг 13 карра чемпиони. Сен бу клубни танлаганинг учун раҳмат. Сен бу афсонанинг бир қисмига айланишни истадинг, бунга эришдинг.

Сен ажойиб мавсум ўтказдинг, 27 гол урдинг, аммо бизнинг фанатлар сендан кўпроқ нарса талаб қилишади. Сени фаолиятингдаги энг катта чорлов кутмоқда. Биз сен билан фахрланамиз, чунки сен болалигингда «Реал» футболкаси билан ухлашингни айтгандинг. Сен бу футболкада дунёнинг энг кучли ҳужумчиларидан бирига айланасан», – дея Переснинг сўзларини келтирмоқда мадридликлар клуби матбуот хизмати.

Ҳозирча Йовичнинг Мадриддаги маоши миқдори маълум эмас.

Йович янги клубида қайси рақамда ўйнаши ҳам ҳозирча номаълум. «Қаймоқранглилар»да ҳозирча фақат 16-рақам бўш турибди. У собиқ клуби «Айнтрахт»да 8-рақам остида ўйнаб келган, Сербия миллий жамоасида эса 19-рақамда ўйнайди.

ОАВ маълумотига кўра, «Реал» унинг трансфери учун «Айнтрахт»га 65-70 миллион евро тўлайди.

2018/19 мавсумида ҳужумчи Франкфурт клубининг барча мусобақалар доирасидаги 48та ўйинида майдонга тушиб, 27+7 самарадорлик кўрсаткичига эришган.

Кўпроқ янгиликлар