Порошенко ўз президентлигига якун ясади

Жаҳон 23:21 / 19.05.2019 20637

Украина президенти Пётр Порошенко 2014 йилдан бери босиб ўтган йўлини холис баҳолай олиши мураккаблигини айтди.

“Вақт ҳаммасини жой-жойига қўяди. Эртами-кечми у гуноҳни савобдан, бошоқни бегона ўтдан ва ҳақиқатни ёлғондан ажратади”, деб айтган ўз лавозимини тарк этаётган президент Украина халқига мурожаатида.

Порошенко Украина ҳозирда 2014 йилдагидан яхшироқ ҳолатда эканини, бунга жамиятнинг фаол қисми кўмаги ва кўпчиликнинг тушуниши эвазига эришилганини айтиб ўтган.

Шу билан бирга Украина президенти “умидларини оқлай олмаганлардан, ислоҳотлар жуда оғриқли бўлганлардан, шу йиллар ичида ёлғонга дуч келиб, ҳақиқатни топа олмаганлар”дан узр сўраган. 

“Ҳаттоки президент барчасини қила олади, деб ишонилса ҳам, у барчасини бирданига қила олмайди”, деб таъкидлаб ўтган Украина етакчиси.

Порошенконинг айтишича, у учун энг аламлиси мамлакатда тинчлик ўрната олмагани ҳисобланади.

Украина раҳбари мамлакатда “Россия тажовузидан сўнг юзага келган иқтисодий инқироздан кейин турмуш даражасини тиклаш анча кечикиш билан бошланганини” тан олган.

Жумладан, Порошенко янги сайланган президент Владимир Зеленскийга муваффақият тилаб қолган. 

“Бир ойгина олдин биз ашаддий рақиблар эдик. Бироқ эртагаёқ, у юртим президенти бўлади. Мен севадиган ва мен европача келажагига ишонадиган давлатнинг. Тангри Украинани асрасин, унинг янги раҳбарини қўллаб-қувватласин”, деб таъкидлаб ўтган Порошенко. 

Порошенко мамлакатнинг Европа Иттифоқи ва НАТОга аъзо бўлиш йўналишидан оғишишига йўл қўймаслик учун сиёсатдан кетмаслигини айтган. Унинг таъкидлашича, у қандайдир бир лавозим учун эмас, балки “давлат қурилишида эришилганларни ҳимоя қилиш” учун қолади.

Кўпроқ янгиликлар