Жээнбеков собиқ президентларни дахлсизликдан маҳрум қилиш ҳақидаги қонунни имзолади

Жаҳон 21:11 / 16.05.2019 13633

Қирғизистон президенти Сооронбай Жээнбеков “Қирғизистон Республикасининг “Қирғизистон Республикаси Президенти фаолиятининг кафолатлари тўғрисида”ги қонунига ўзгартиришлар киритиш тўғрисида”ги қонунни имзолади. Ушбу ўзгартиришлар собиқ президентларни дахлсизликдан маҳрум қилади. 

Шунингдек, собиқ президент катта сиёсатда қолишга ёки давлат лавозимида ишлашга қарор қилса, ўзига тегишли барча имтиёзлардан маҳрум этилади. 

Қонун Жогорку Кенеш (парламент) томонидан 2019 йил 4 апрелда қабул қилинган. 

Қирғизистон конституциявий палатаси “Қирғизистон Республикаси Президенти фаолиятининг кафолатлари тўғрисида”ги қонуннинг 12-моддасини конституцияга зидлигини тан олган. Бу модда собиқ президентнинг мутлақ дахлсизлигини кафолатлаган. 

Қонун расман эълон қилинган кундан 10 кун ўтгач кучга киради.

Айни вақтда Қирғизистонда собиқ президент мақомига Роза Отунбаева ва Алмазбек Атамбоев эга. Асқар Акаев ва Курманбек Бакиев бу мақомдан маҳрум этилганлар. 

Кўпроқ янгиликлар