Туркия ҳукумати «Росатом» томонидан қурилаётган АЭС пойдеворида ёриқлар аниқлади

Жаҳон 17:40 / 15.05.2019 41194

Туркия атом энергетикаси регулятори (Turkey’s Atomic Energy Authority) Россиянинг «Росатом» давлат корпорацияси қураётган «Аккую» атом электр станциясининг бетон пойдеворида икки марта ёриқ пайдо бўлганини аниқлади. Бу ҳақда РБК Туркиянинг Haberturk нашрига таянган ҳолда хабар тарқатди.

Haberturk маълумотига кўра, пойдевор бетонидаги биринчи ёриқ ўтган йилнинг июлида аниқланган. Шундан сўнг «Росатом» бетонни қайтадан қуйган, бироқ TAEK яна бир ёриқни аниқлаган — Россия компанияси яна бетонни алмаштиришга мажбур бўлган, муаммони бартараф этиш бўйича ишлар ўтган йилнинг сентябрь ойида якунланган.

2018 йил сентябрида АЭС қурилишида янги пудратчи, 50 фоизи «Росатом»га тегишли бўлган «Концерн Титан-2» компанияси (иш ҳажми 10 миллиард доллар) пайдо бўлди. Бироқ ўшанда пудратчининг алмаштирилишига пойдевордаги ёриқлар сабаб бўлгани хабар қилинмаганди.

«Ўтган йилдаги ёриқлар бетон аралашмасини танлаш вақтида, яъни бетон синов мақсадида қуйилганда аниқланганди. Аралашмани танлаш босқичида ёриқлар пайдо бўлиши мумкин, бу меъёрий ишчи ҳолат», — дея изоҳлайди РБКнинг «Росатом»даги манбаси.

«Росатом»дагиларнинг маълум қилишича, «Аккую» АЭСини қуриш ишлари айни вақтда жадвал бўйича амалга оширилмоқда.

20 миллиард долларга баҳоланган «Аккую» атом электростанцияси Россиянинг BBER-1200 реакторлари ўрнатилган тўртта энергоблокни ўз ичига олади.

АЭСни қуриш бўйича битим 2010 йилда имзоланган. 2015 йилда Туркия Сурия чегарасида Россияга тегишли қирувчи самолётни уриб туширгач, лойиҳа тўхтаб қолган эди. 2017 йилда у яна қайта тикланган.

Эслатиб ўтамиз, «Росатом» Ўзбекистонда ҳам АЭС қуришни режалаштирган. 

Кўпроқ янгиликлар