«Liverpul» hujumchilari Muhammad Saloh va Roberto Firmino Chempionlar ligasi yarim finalining «Barselona»ga qarshi javob o‘yinida qatnasha olishmaydi.
«Qizillar» bosh murabbiyi Yurgen Kloppning so‘zlariga ko‘ra, misrlik hujumchining ahvoli yaxshilanmoqda, ammo u ertangi bahsda maydonga tusha olmaydi.
«Uning bosh miyasida chayqalish bo‘lgan, shuning uchun shifokorlar unga maydonga tushishga ruxsat berishmadi. U o‘zini yaxshi his qilmoqda, ammo tibbiyot nuqtai nazaridan barchasi o‘z holiga qaytishi uchun vaqt talab etiladi. U juda qattiq xafa, ammo biz hech narsa qila olmaymiz», — deya Kloppning so‘zlarini keltirgan Liverpool Echo.
Saloh shanba kuni APL doirasidagi «Nyukasl» bilan bahsda (3:2) jarohatlangan edi – o‘yinning 68-daqiqada u raqib darvozaboni bilan to‘qnashib ketib, boshidan shikastlangandi.
Firminoning ertangi o‘yinni o‘tkazib yuborishi avvalroq aniq bo‘lib ulgurgandi. 27 yoshli braziliyalik futbolchi 27 aprel kuni «Haddersfild Taun»ga qarshi o‘yin vaqtida (5:0) mushaklarini jarohatlab olgandi. U APLning 38-turida «Vulverhempton»ga bilan kechadigan o‘yingacha safga qaytishi kutilmoqda.
Eslatib o‘tamiz, «Barselona» a'zolaridan hujumchi Usmon Dembele safdan chiqqan.
«Liverpul»-«Barselona» o‘yini ertaga, Toshkent vaqti bilan chorshanbaga o‘tar kechasi soat 00:00da boshlanadi. Ilk o‘yinda kataloniyaliklar klubi 3:0 hisobida g‘alaba qozongan.