Муайян яшаш жойига эга бўлмаган шахслар учун ижтимоий қўллаб қувватлаш марказлари ташкил этилади

Ўзбекистон 10:50 / 24.04.2019 2429

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “Муайян яшаш жойига эга бўлмаган шахсларни ижтимоий қўллаб қувватлаш тизимини такомиллаштиришга доир қўшимча чора-тадбирлар тўғрисида”ги қарори лойиҳаси жойлаштирилди.

Ҳужжат билан Ўзбекистон Республикаси Ички ишлар вазирлиги ва Соғлиқни сақлаш вазирлигининг муайян яшаш жойига эга бўлмаган шахслар учун ижтимоий қўллаб қувватлаш марказларини ташкил этиш тўғрисидаги таклифи маъқулланиши мумкин.

Белгиланишича, Марказ Ўзбекистон Республикаси Соғлиқни сақлаш вазирлиги ҳузуридаги Тиббий-ижтимоий хизматлар агентлигининг таркибий тузилмаси ҳисобланади.

Марказнинг асосий вазифалари этиб қуйидагилар белгиланади:

бошпанасиз шахсларнинг тунги пайтларда вақтинча ётиб қолишлари учун шароитлар яратиш;

бошпанасиз шахсларга беғараз ижтимоий ёрдам кўрсатиш;

нормал ҳаётга қайтиш истагини билдирган бошпанасиз шахсларни касбга тайёрлаш орқали уларнинг бандлигини таъминлаш.

Марказ фаолиятини молиялаштириш манбалари этиб қуйидагилар белгиланади:

Қорақалпоғистон Республикаси бюджети, вилоятлар ва Тошкент шаҳар маҳаллий бюджет маблағлари;

жисмоний ва юридик шахсларнинг ҳомийлик хайриялари;

қонун ҳужжатларида тақиқланмаган бошқа манбалар.

Кўпроқ янгиликлар