Фуқароларнинг ўзини ўзи бошқариш органлари ходимларини қайта тайёрлаш институти ташкил этилади 

Ўзбекистон 10:22 / 24.04.2019 2411

Норматив-ҳуқуқий ҳужжатлар лойиҳалари муҳокамаси порталида “Фуқароларнинг ўзини ўзи бошқариш органлари ходимларининг малакасини ошириш ва қайта тайёрлаш институтини ташкил этиш тўғрисида”ги президент қарори лойиҳаси жойлаштирилди.

Ҳужжат билан Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши, Ўзбекистон Республикаси Президенти ҳузуридаги Давлат бошқаруви академияси ҳамда Олий ва ўрта махсус таълим вазирлигининг Фуқароларнинг ўзини ўзи бошқариш органлари ходимларининг малакасини ошириш ва қайта тайёрлаш институтини ташкил этиш тўғрисидаги таклифи маъқулланиши мумкин.

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузуридаги фуқароларнинг ўзини ўзи бошқариш органлари ходимларининг малакасини ошириш бўйича ўқув курслари штат бирлиги ва молиялаштиришнинг амалдаги тартиби сақланган ҳолда институтнинг ҳудудий филиаллари ҳисобланади.

Қуйидагилар Институт фаолиятининг асосий вазифалари этиб белгиланади:

замонавий шароитларда маҳалла ходимларининг касбий билим ва савиясига қўйилаётган талабларни ҳисобга олган ҳолда малакасини ошириш;

маҳаллий бошқарув ва ҳудудий ривожланиш соҳасидаги ўзига хос хусусиятларни ҳисобга олган ҳолда чуқур ва амалиётга йўналтирилган билимларни, шунингдек, давлат ва ҳудудий дастурларни ҳамда норматив-ҳуқуқий ҳужжатларни сифатли ижро этиш кўникмаларини шакллантириш;

маҳалла ходимларида фаолиятни режалаштириш ва иш режалари (“йўл хариталари”) ни сифатли бажариш кўникмаларини шакллантириш;

малака ошириш курслари ва ўқув-амалий семинарлар жараёнида аниқланган муаммолар бўйича ахборот-таҳлилий материалларни тайёрлаш;

маҳаллани ноёб тузилма сифатида ўрганишга йўналтирилган тадқиқотларни мувофиқлаштириш;

фуқароларнинг ўзини ўзи бошқариш органларини ва ҳудудий филиалларни ўқув-услубий адабиётлар билан таъминлаб бориш.

Қуйидагилар Институт ва унинг ҳудудий филиаллари фаолиятини молиялаштириш манбалари этиб белгиланади:

Ўзбекистон Республикаси Давлат бюджети маблағлари;

Ўзбекистон “Маҳалла” хайрия жамоат фонди маблағлари;

Ўзбекистон Республикаси Инновацион ривожлантириш вазирлиги томонидан ўтказиладиган танловлар натижалари бўйича ажратиладиган грантлар;

халқаро молия институтлари ва бошқа институтлар, хорижий ташкилотларнинг грантлари;

тадқиқотлар ўтказишдан ва шартнома асосида хизматлар кўрсатишдан тушадиган тушумлар;

жисмоний ва юридик шахсларнинг ҳомийлик хайриялари;

қонун ҳужжатларида тақиқланмаган бошқа манбалар.

Кўпроқ янгиликлар