Ўзбекистон Осиё ва Тинч океани ҳудудлари бўйича таълимни тан олиш Токио Конвенциясига қўшилади

Ўзбекистон 16:37 / 23.04.2019 1650

23 апрель куни Таълим сифатини назорат қилиш давлат инспекцияси ҳамда ЮНЕСКОнинг Ўзбекистондаги ваколатхонаси билан ҳамкорликда Ўзбекистон Республикасининг Осиё ва Тинч океани ҳудудлари бўйича таълимни тан олиш Токио Конвенциясига қўшилиш масаласига бағишланган семинар ташкил этилди. Ушбу тадбирда ЮНЕСКО томонидан таклиф этилган халқаро экспертлар иштирок этишди, деб хабар берди Таълим сифатини назорат қилиш давлат инспекцияси матбуо хизмати. 

Хабарда айтилишича, семинарда Ўзбекистонда амалда бўлган хорижий давлатларда таълим олганлик тўғрисида ҳужжатларни тан олиш бўйича меъёрларни халқаро талабларга мослаштириш, Миллий ахборот марказини ташкил этиш, уларнинг электрон базасини яратиш, халқаро электрон базаларга уланиш, Халқаро конвенциялар, жумладан Токио Конвенциясини ратификация қилиш каби масалалалар муҳокама қилинди.

Маълумот берилишича, Париждаги ЮНЕСКО ташкилоти томонидан “Таълим соҳасидаги малакаларни тан олишга доир Глобал Конвенция” лойиҳаси тайёрланиб муҳокамадан ўтказилмоқда ва у ЮНЕСКОнинг шу йилнинг ноябрь ойида ўтказиладиган 40-ялпи Конференциясида қабул қилиниши режалаштирилган. Таълим сифатини назорат қилиш давлат инспекция мутахассислари Парижда Глобал Конвенция лойиҳаси муҳокамасига бағишланган халқаро конференцияда қатнашиб тажриба ўрганиб келишган эди.  

Бугун кунда ушбу масалада 58 та давлат томонидан ратификация қилинган Лиссабон конвенцияси ҳамда Осиё ва Тинч океани ҳудудлари бўйича Токио, Африка давлатлари учун Аддис-Абеба Конвенциялари амалда қўлланиб келинмокда. Барча конвенциялар ЮНЕСКО томонидан мувофиқлаштирилади. Муҳокамадаги Глобал конвенция лойиҳаси улардан фарқли равишда ҳудуд танламаган ҳолда тартиб белгилашга қаратилган.

Фото: Таълим сифатини назорат қилиш давлат инспекцияси матбуо хизмати

2018 йил октябрь ойида Осиё ва Тинч океани аъзо-давлатлари малакани тан олиш орқали “олий таълим мобиллиги ва халқаролашувининг янги даври”ни эълон қилди (Сеул баёноти). 2018 йил 1 февралдан кучга кирган таълимни тан олиш бўйича Токио конвенцияси Осиё ва Тинч океани минтақаси ва ундан ташқарида жойлашган давлатлар орасида талабаларнинг чегаралараро мобиллиги масаласини сиёсий ва амалий жиҳатдан уйғунлаштириш имкониятларини яратади. 

“Бугунги кунда ҳужжатларни нострификация қилдириш учун Вазирлар Маҳкамаси ҳузуридаги Таълим сифатини назорат қилиш давлат инспекциясига бўлаётган мурожаатлар сони йилдан-йилга ошиб бормоқда. Жумладан, 2017 йилда 1219 та мурожаат бўлиб, шундан 447 та ҳужжат ностирификация қилинган бўлса, 2018 йилда 2547 та мурожаатдан 1189 таси нострификация қилинган”, дейилади хабарда.

Маълумот учун, Ўзбекистон Президентининг “Таълим сифатини назорат қилиш тизимини такомиллаштириш бўйича қўшимча чора-тадбирлар тўғрисида”ги қарори доирасида Таълим инспекцияси ҳамда Олий ва ўрта махсус таълим вазирлигининг қўшма қарори билан халқаро тан олинган ташкилотларнинг рейтингида биринчи 1000таликка киритилган олий таълим муассасалари рўйхати тасдиқланди. Унга кўра ушбу ОТМлари битирувчиларининг таълим тўғрисидаги ҳужжатларини нострификациялаш тўғридан-тўғри амалга ошириладиган бўлди.

Кўпроқ янгиликлар