Индонезияда сайловлардаги овозларни ҳисоблаш вақтида 92 киши вафот этди

Жаҳон 20:08 / 23.04.2019 9209

Индонезияда ўтган умумий сайловлардаги овозларни ҳисоблаш вақтида кучли толиқиш сабабли камида 92 киши вафот этди. Бу ҳақда мамлакатнинг марказий сайлов комиссияси раиси Ориф Будиманга иқтибос келтирган ҳолда Antara ахборот агентлиги хабар берди. 

Маълум қилинишича, яна 374 киши бир кун давом этган овозлар ҳисоб-китобидан кейин соғлиғидаги муаммолардан шикоят қилган. Қурбонлардан бири Малаку вилоятидаги аҳоли пункти сайлов участкаси бошлиғи бўлиб, у вилоятдаги сайловларга якун ясаш бўйича ўтказилган мажлисда вафот этган. 

Сайлов комиссияси аъзолари молия вазирлиги мансабдор шахслари билан учрашиб, жабрланувчиларга молиявий компенсация тўланишини муҳокама қилишмоқчи. Комиссия вафот этганлар яқинларига 30-36 млн рупий, касал бўлиб қолганларга 30 млн рупийга яқин ва жароҳат олганларга максимал 16 млн рупий тўлаш таклифини илгари сурган. 

17 апрелда Индонезияда ўтган сайловлар дунёдаги энг йирик сайловлар бўлди. Мамлакат аҳолиси президентдан ташқари, парламентнинг иккита палатаси депутатлари, маҳаллий депутатларни сайлашган. Сайловларда овоз бериш ҳуқуқига эга бўлган 193 млн кишидан 80 фоизи иштирок этган. Бутун мамлакат бўйлаб 813 мингдан кўпроқ сайлов участкаси фаолият олиб борган.  

Сайлов комиссияси ходимлари сайловчиларга хизмат кўрсатиш ва овозларни ҳисоблаш бўйича вазифалар билан ҳаддан ташқари юкланган бўлганлар ҳамда фақатгина пешин намози вақтида бироз танаффус қила олганлар. Умуман олганда, сайлов комиссияси ходимлари деярли 48 соат танаффуссиз ишлашларига тўғри келган.

Овозлар ҳисобланиши расман 22 май куни якунланишига қарамай, президент лавозимига мухолиф номзод ва собиқ генерал Прабово Субианто ўзини Индонезиянинг янги президенти деб эълон қилган. У, шунингдек, рақиби – амалдаги президент Жоко Видодо томонидан овозлар сохталаштирилганининг исботига эга эканлигини айтган.

Кўпроқ янгиликлар