Indoneziyada o‘tgan umumiy saylovlardagi ovozlarni hisoblash vaqtida kuchli toliqish sababli kamida 92 kishi vafot etdi. Bu haqda mamlakatning markaziy saylov komissiyasi raisi Orif Budimanga iqtibos keltirgan holda Antara axborot agentligi xabar berdi.
Ma'lum qilinishicha, yana 374 kishi bir kun davom etgan ovozlar hisob-kitobidan keyin sog‘lig‘idagi muammolardan shikoyat qilgan. Qurbonlardan biri Malaku viloyatidagi aholi punkti saylov uchastkasi boshlig‘i bo‘lib, u viloyatdagi saylovlarga yakun yasash bo‘yicha o‘tkazilgan majlisda vafot etgan.
Saylov komissiyasi a'zolari moliya vazirligi mansabdor shaxslari bilan uchrashib, jabrlanuvchilarga moliyaviy kompensatsiya to‘lanishini muhokama qilishmoqchi. Komissiya vafot etganlar yaqinlariga 30-36 mln rupiy, kasal bo‘lib qolganlarga 30 mln rupiyga yaqin va jarohat olganlarga maksimal 16 mln rupiy to‘lash taklifini ilgari surgan.
17 aprelda Indoneziyada o‘tgan saylovlar dunyodagi eng yirik saylovlar bo‘ldi. Mamlakat aholisi prezidentdan tashqari, parlamentning ikkita palatasi deputatlari, mahalliy deputatlarni saylashgan. Saylovlarda ovoz berish huquqiga ega bo‘lgan 193 mln kishidan 80 foizi ishtirok etgan. Butun mamlakat bo‘ylab 813 mingdan ko‘proq saylov uchastkasi faoliyat olib borgan.
Saylov komissiyasi xodimlari saylovchilarga xizmat ko‘rsatish va ovozlarni hisoblash bo‘yicha vazifalar bilan haddan tashqari yuklangan bo‘lganlar hamda faqatgina peshin namozi vaqtida biroz tanaffus qila olganlar. Umuman olganda, saylov komissiyasi xodimlari deyarli 48 soat tanaffussiz ishlashlariga to‘g‘ri kelgan.
Ovozlar hisoblanishi rasman 22 may kuni yakunlanishiga qaramay, prezident lavozimiga muxolif nomzod va sobiq general Prabovo Subianto o‘zini Indoneziyaning yangi prezidenti deb e'lon qilgan. U, shuningdek, raqibi – amaldagi prezident Joko Vidodo tomonidan ovozlar soxtalashtirilganining isbotiga ega ekanligini aytgan.
