Tashkent Law Spring: 37 мамлакатдан мингдан зиёд ҳуқуқ соҳаси вакиллари Тошкентда жам бўлади

Ўзбекистон 17:28 / 22.04.2019 2360

Жорий йилнинг 25-27 апрель кунлари Тошкентда илк бор Tashkent Law Spring – халқаро миқёсдаги юридик форум бўлиб ўтади. Бу ҳақда Адлия вазирлиги матбуот брифингида маълумот берди.

«Ҳуқуқ – жадал модернизация даврида»  мавзусида ўтказилаётган форумда замонавий ҳуқуқ тизимини ривожлантириш масаласи, юридик назария ва амалиётдаги муаммолар юзасидан муҳокамалар бўлиб ўтади.

«Фаол инвестициялар ва ижтимоий ривожланиш йили»   давлат дастури доирасида ўтказиладиган мазкур форум жаҳон юридик ҳамжамиятини Ўзбекистон қонунчилиги билан яқиндан таништириш, мамлакатдаги ислоҳотлар моҳиятини объектив тарзда етказиб беришни мақсад қилади. Форумда кўтариладиган масалалар бўйича чиқарилган хулосалардан миллий қонунчиликни ривожлантиришда фойдаланиш кўзда тутилган» , – дейди Адлия вазири бўлим бошлиғи Аъзам Мадаминов.

Маълум қилинишича, форум дастури «Сифатли давлат бошқаруви» , «Қонун устуворлигини таъминлаш ва суд-ҳуқуқ тизимини ислоҳ қилиш» , «Фаол инвестиция сиёсати»  йўналишлари бўйича 17та сессияни ҳамда нотариат ва суд-экспертиза тизимига оид иккита давра суҳбатини ўз ичига олади. 

Форум доирасида «Йилнинг энг яхши адвокати» , «Йилнинг энг яхши адвокатлик тузилмаси» , «Энг яхши корпоратив юридик хизмат»  номинациялари бўйича номзодларни тақдирлаш маросими ҳам бўлиб ўтади.

Форум ташкилий қўмитаси иштирок учун мурожаатлар белгиланган муддатдан олдин тўхтатилганига изоҳ берди. «Аввал бошиданоқ форумда 800 нафар иштирокчи бўлиши режалаштирилган эди. Қатнашиш учун жуда кўп ариза келиб тушгани, ҳали қабул муддати тугамасиданоқ кўзланган миқдордан кўп киши рўйхатга олингани боис қабулни 5 кун олдинроқ тўхтатишга тўғри келди. Бунда жисмоний имкониятлар инобатга олинди. Рўйхатдан ўта олмаганлардан ташкилий қўмита узр сўрайди»  , деди Аъзам Мадаминов.

Тадбирда юриспруденция соҳасининг мингдан зиёд вакиллари иштироки кутилмоқда. Жумладан, 37 мамлакатдан адлия вазирлари, таниқли адвокатлар, бизнес вакиллари, назариётчи олимлар, 240 нафар делегат ташриф буюради.

Форумда иштирок эта олмаганлар уни онлайн трансляция асосида Oʻzbekiston24 телеканали ҳамда tashkentlawspring.uz сайти орқали кузатишлари мумкин.

Эслатиб ўтамиз, Тошкент шаҳрида илк маротаба халқаро миқёсда бўлиб ўтаётган мазкур юридик форумда иштирок этиш пулли тартибда амалга оширилиши ҳақида маълум қилинган эди.

Кўпроқ янгиликлар