«СЭС» ходимлари «Молочная кухня» фаолиятини тўхтатишмоқчи. Тадбиркорнинг тинчини бузиш кимга керак бўлиб қолди?

Жамият 19:20 / 22.04.2019 36788

«Молочная кухня» бренди остида фаолият кўрсатаётган Diyor Biznes компаниясининг тақдири таҳдидлар остида қолмоқда. 

Тошкент шаҳрида гуллаб-яшнаётган бизнесга турли усуллар билан таъсир ўтказиш, унинг фаолиятини синдиришга ҳаракат қилинмоқда, дейди компания раҳбари Шуҳрат Қаюмов. 

«100дан ортиқ ишчи ишлаётган корхонамизда сут маҳсулотларини қайта тайёрлаш орқали болалар ва катталар учун тайёр маҳсулотлар ишлаб чиқарилади. Фаолиятимиз сокин давом этаётган эди, апрелнинг биринчи ўн кунлигида ҳаммаси ўзгариб кетди. Биз бу ҳақда ижтимоий тармоқлар орқали хабар тарқатишга, ўзимизни ҳимоя қилишга мажбур бўлдик.

Видео: Mover (tas-ix)

Видео: Youtube

«Омбудсман рухсати билан Республика ДСЭНМ вакиллари корхона фаолиятини текширишга келишди ва турли важлар билан «Молочная кухня»  фаолиятини тўхтатиб қўйиш тўғрисида қарор чиқарилди», —  дейди у.

Аммо жараённинг кечишида қандайдир шубҳали вазиятлар мавжуд ва ҳозир шуларга тўхталмоқчимиз.

Жорий йил 5 апрель куни Тадбиркорлик субъектларини ҳуқуқлари ва қонуний манфаатларини ҳимоя қилиш бўйича вакилнинг ўринбосари компания фаолиятини текширишга рухсат берган. Республика ДСЭНМ «хавфни таҳлил этиш» натижасида компания фаолиятини текширмоқчилигини билдирган.

Diyor Biznes компанияси раҳбари Шуҳрат Қаюмов

6 апрель куни Республика ДСЭНМ  бош врачи вазифасида ишлаб турган Қурбонов Diyor Biznes компанияси фаолиятини текширишга буйруқ берган.

10 апрель куни Республика ДСЭНМ раҳбари Фармацевтика тармоғини ривожлантириш агентлигининг хатига асосланиб, текширув натижасига кўра, «Молочная кухня» фаолиятини тўхтатишга қарор қилган. 

Kun.uz мухбирлари компания ишлаб чиқариш цехида бўлиб, иш фаолият билан танишди. ДСЭНМ қарорида таъкидланган айрим айбловлар эса кўзга ташланмади.  

Тадбиркорнинг ўзи текширув ҳақида шундай дейди: «Тадбиркорлар ҳуқуқларини ҳимоя қилувчи Омбудсманнинг ўзи фаолиятимизни текширишга рухсат бергани бизни ажаблантирди. ДСЭНМ (давлат сан-эпидем назорат маркази - таҳр.) вакилларидан ҳам сўрадик: нега огоҳлантирмасдан текширув бошланди? Туман ва шаҳар ДСЭНМ даражасида назорат бўла туриб, дабдурустдан нега республикадан келишди? Кимдир маҳсулотларимиздан зиён кўрдими? Нега шу даражада юқори орган ҳаракатга тушди?

Улар текширувни ўтказиб, нимадир камчилик топишга мажбур бўлганини сездириб қўйишди: уларга тепадан раҳбарият корхонамизни ёпишни буюрганини айтишди» .

Diyor Biznes компанияси ишлаб чиқариш цехи Тошкент вакцина ва зардоблар ишлаб чиқариш илмий текшириш институтига яқин жойлашгани, институтда микробиологик, бактериологик ва иммунобиологик препаратлар тайёрлангани маълум қилинди. 

Фармацевтика тармоғини ривожлантириш агентлигининг ДСЭНМга маълум қилишича, институтда Беккет ўраси ва муфель печлари мавжуд. 

Бош врач Баҳром Алматовнинг айтишича, илмий асосланган хулоса ва лаборатория натижалари бўлмай, корхона ҳудудига яқин жойда Беккет ўраси мавжудлиги тахмин қилинган, шу асос билан корхона фаолияти тўхтатиб қўйилган. 

Баҳром Алматов

Ўрада лаборатория синовларида ишлатилган ҳайвонлар танаси йўқ қилинади. Аммо унинг зиёни ҳам, атроф-муҳитга таъсири ҳам ўрганилмаган, чунки унинг мавжудлиги ҳам расман исботланмаган. 

Алматовнинг таъкидлашича, марказ фақат корхона фаолиятига тегиниб, унга туташ аҳоли хонадон ва маиший бино эгалари огоҳлантирилмаган. Гап шундаки, ДСЭНМ вакиллари аввало, Тошкент вакцина ва зардоблар ишлаб чиқариш илмий текшириш институтининг хусусийлаштирилган майдонларига қизиқмоқда. Қизиғи, Республика ДСЭНМ раҳбари ҳам «исми-шарифи номаълум раҳбарият» топшириғига кўра ҳаракатланаётганини айтмоқда. 

Тадбиркорнинг таъкидлашича, ушбу майдоннинг хусусийлаштирилиши борасида жуда кўп низолар бўлган. Беш йил аввал бошланган суд ишлари 2018 йилдагина ўз ниҳоясига етиб, тадбиркор ўз мулкини сақлаб қолганди. 

Биз Беккет ўраси мавжуд, дея таъкидланаётган ҳудудни бориб кўрдик. У ерда Беккет ўраси учун ташкил этилган бетон қоплама ва гидроизоляцияланган қудуқни тополмадик. Шунингдек, хавфли ҳудуд дея кўрилаётган институт бегоналар учун ёпиб қўйилмаган, унинг атрофида огоҳлантирувчи белги ҳам йўқ.

Алишер Рўзиохунов

Кўпроқ янгиликлар