21 апрель куни Шри-Ланкада кетма-кет 6та портлаш юз берди. Орол давлат пойтахти Коломбо шаҳри марказидаги учта «люкс» меҳмонхона - «Шангри-Ла», «Циннамон Гранд» ва Кингсбери отелида, католик черковида портлашлар рўй берди. Худди шу вақтда пойтахт яқинидаги Негомбо ва Баттикалоа шаҳридаги черковларда ҳам портлашлар содир этилган. Черковларда бу вақтда Пасха байрами муносабати билан ибодатлар давом этаётган эди.
Бу Шри-Ланкада фуқаролар уруши тугаганидан кейинги энг йирик хунрезлик бўлди.
Охирги маълумотларга кўра, портлашлар оқибатида ҳалок бўлганлар сони 185 нафарни ташкил қилмоқда. Шунингдек, 500 нафарга яқин киши жароҳатланган.
Ҳукумат вакиллари маълумотига кўра, қурбонлар орасида камида 35 нафар чет эллик бор — улар меҳмонхонада яшаётганлар бўлган, улар қайси давлатлар фуқаролари бўлгани маълум эмас.
Айни вақтда мамлакатдаги барча байрам тадбирлари бекор қилинган. Шри-Ланка бош вазири шошилинч ҳукумат йиғилишини чақирган.
Ҳозирча терактлар учун жавобгарликни ҳеч бир гуруҳ ўз зиммасига олмади. BBC News хабарида қайд этилишича, ҳукумат сўнгги ойларда бир неча марта Сурияда ИШИД сафида жанг қилган диний ақидапарастларнинг Шри-Ланкага оммавий қайтишидан хавотирдалигини маълум қилган эди. Бундан ташқари, Шри-Ланкада радикал кайфиятдаги буддавийлик ташкилотлари ҳам фаолият олиб боради: 2018 йили улар масжидлар ва мусулмонларнинг уйларига кетма-кет ҳужумлар уюштирган, бунинг оқибатида кейинчалик мамлакатда фавқулодда ҳолат жорий этилган эди.
