21 aprel kuni Shri-Lankada ketma-ket 6ta portlash yuz berdi. Orol davlat poytaxti Kolombo shahri markazidagi uchta «lyuks» mehmonxona - «Shangri-La», «Tsinnamon Grand» va Kingsberi otelida, katolik cherkovida portlashlar ro‘y berdi. Xuddi shu vaqtda poytaxt yaqinidagi Negombo va Battikaloa shahridagi cherkovlarda ham portlashlar sodir etilgan. Cherkovlarda bu vaqtda Pasxa bayrami munosabati bilan ibodatlar davom etayotgan edi.

Bu Shri-Lankada fuqarolar urushi tugaganidan keyingi eng yirik xunrezlik bo‘ldi.

Oxirgi ma'lumotlarga ko‘ra, portlashlar oqibatida halok bo‘lganlar soni 185 nafarni tashkil qilmoqda. Shuningdek, 500 nafarga yaqin kishi jarohatlangan.

Hukumat vakillari ma'lumotiga ko‘ra, qurbonlar orasida kamida 35 nafar chet ellik bor — ular mehmonxonada yashayotganlar bo‘lgan, ular qaysi davlatlar fuqarolari bo‘lgani ma'lum emas.

Ayni vaqtda mamlakatdagi barcha bayram tadbirlari bekor qilingan. Shri-Lanka bosh vaziri shoshilinch hukumat yig‘ilishini chaqirgan.

Hozircha teraktlar uchun javobgarlikni hech bir guruh o‘z zimmasiga olmadi. BBC News xabarida qayd etilishicha, hukumat so‘nggi oylarda bir necha marta Suriyada IShID safida jang qilgan diniy aqidaparastlarning Shri-Lankaga ommaviy qaytishidan xavotirdaligini ma'lum qilgan edi. Bundan tashqari, Shri-Lankada radikal kayfiyatdagi buddaviylik tashkilotlari ham faoliyat olib boradi: 2018 yili ular masjidlar va musulmonlarning uylariga ketma-ket hujumlar uyushtirgan, buning oqibatida keyinchalik mamlakatda favqulodda holat joriy etilgan edi.