Мексикада мафия президентга таҳдид қилмоқда

Жаҳон 07:37 / 21.04.2019 15727

Мексика мафияси президент Андрес Мануэл Лопес Обрадорга таҳдид қила бошлади. Мафия Гуанахуато штатидаги Селайя шаҳридаги кўприкда Лопес Обрадорга таҳдид билдирилган плакатни осиб қўйган.

Noticaribe порталининг хабар беришича, “Санта-Роса-де-Лима” картели ўзининг Босқон (Кувалда) лақабли етакчиси президентдан Гуанахуатодаги махсус операцияни тўхтатишни сўраган, акс ҳолда катта муаммолар ва зўравонликлар ваъда қилган плакатларни осиб қўйган.

Таъкидланишича, Гуанахуатода ёнилғи қувурларидан ёнилғи ўғирловчи мафия – “уачиколерос”га қарши операция олиб борилмоқда ва Босқон у ердан денгиз пиёда қўшинлари ва ҳарбийларни чақиртириб олишни талаб қилган. Бунга эса операция вақтида картел етакчиларидан бирининг федерал кучлар билан отишмада ўлгани сабаб қилиб кўрсатилган.  

Охирги йилларда штатда зўравонлик авж олган. 2018 йил майида бу ерда бир неча кун ичида 60 дан кўпроқ одам, июлда эса яна 40 одам ўлдирилган. Бир нечта наркокартел Гуанахуатога эгалик қилиш учун талашиб келади.

Лопес Обрадор 2018 йил охирида президент лавозимини эгаллагач, ёнилғи ўғирланишига қарши курашни эълон қилган. Ҳукумат қувурлардан ёнилғи ўғирланишига чек қўйиш мақсадида уни цистерналарда етказишга ўтган. Бундан ташқари, барча нефтни қайта ишловчи заводлар ва транспорт тизимининг стратегик объектларига қўшинлар киритилган. Буларнинг барчаси ёқилғи қуйиш шохобчаларига бензин етказилишида узилишлар бўлиши ва катта навбатлар юзага келишига олиб келган.  

Кўпроқ янгиликлар