Ер кадастрига доир ахборотлар вазирлик ва идораларнинг сайтига жойлаштирилади 

Ўзбекистон 10:32 / 19.04.2019 5437

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “Қишлоқ хўжалигига мўлжалланган ерларнинг ер кадастрига доир ахборотларини вазирлик ва идораларнинг ҳамда маҳаллий давлат ҳокимияти органларининг расмий веб-сайтларига жойлаштириш тартиби тўғрисида”ги қарори лойиҳаси жойлаштирилди.

Қишлоқ хўжалигига мўлжалланган ерларнинг ер кадастрига доир ахборотларини тайёрлаш ва умумий фойдаланиш учун вазирлик ва идораларнинг ҳамда маҳаллий давлат ҳокимияти идораларининг расмий веб-сайтларига жойлаштириш тартиби тўғрисидаги низомга кўра, ер кадастрига доир ахборот Ўзбекистон Республикасининг давлат ахборот ресурси ҳисобланади ва ундан тегишли вазирлик ва идоралар ҳамда маҳаллий давлат ҳокимияти идоралари, манфаатдор юридик ва жисмоний шахслар фойдаланиши учун мўлжалланади.

Ер кадастрига доир ахборотлар қуйидаги турларга бўлинади:

фойдаланиши чекланган ер кадастрига доир ахборот;

очиқ ер кадастрига доир ахборот.

Фойдаланиши чекланган ер кадастрига доир ахборотга – қишлоқ хўжалигини юритиш учун белгиланган тартибда ажратилган ер участкасида қишлоқ хўжалиги корхоналари, муассасалари ва ташкилотларига оид ахборотлар киради ва ушбу ахборотлардан келтириб ўтилган вазирликлар, идоралар ва ташкилотлар томонидан фойдаланилади.

Очиқ ер кадастрига доир ахборотларга – бугунги кунда фойдаланилмаётган, шунингдек қишлоқ хўжалиги корхоналари, ташкилот ва муассасаларига белгиланган тартибда ажратиб берилмаган, вақтинча тарқатилмасдан турган қишлоқ хўжалигига мўлжалланган ерлар тўғрисидаги ахборотлар киради ва ушбу ахборотлардан келтириб ўтилган вазирликлар, идоралар ва ташкилотлар ҳамда барча юридик ва жисмоний шахслар томонидан фойдаланилади.

Қуйидагилар ер кадастрига доир ахборотни шакллантиришга масъул ҳисобланади:

а) Ўзбекистон Республикаси Ер ресурслари, геодезия, картография ва давлат кадастри давлат қўмитаси, Қорақалпоғистон Республикаси ва вилоятлар ер ресурслари ва давлат кадастри бошқармалари, туманлар (шаҳарлар) ер ресурслари ва давлат кадастри бўлимлари;

б) Ўзбекистон Республикаси Сув хўжалиги вазирлиги, Қорақалпоғистон Республикаси Сув хўжалиги вазирлиги, ирригация тизимлари ҳавза бошқармалари, туманлар (Қувасой шаҳар) ирригация бўлимлари;

в) Ўзбекистон Республикаси Қишлоқ хўжалиги вазирлиги, Қорақалпоғистон Республикаси Қишлоқ хўжалиги вазирлиги, вилоятлар қишлоқ хўжалиги бошқармалари, туманлар (Қувасой шаҳрининг) қишлоқ хўжалиги бўлимлари;

г) Ўзбекистон фермер, деҳқон хўжаликлари ва томорқа ер эгалари кенгаши, Қорақалпоғистон Республикаси ва вилоятлар фермер, деҳқон хўжаликлари ва томорқа ер эгалари кенгашлари, туман фермер, деҳқон хўжаликлари ва томорқа ер эгалари кенгашлари.

Ер кадастрига доир ахборотларни Agroonline.uz дастури орқали шакллантириш, янгилаб бориш ва фойдаланиш мувофиқ схема бўйича амалга оширилади.

Ер кадастрига доир ахборотларда қуйидагилар акс эттирилади:

а) Давергеодезкадастр қўмитаси идоралари томонидан:

ер участкасининг жойлашган жойи, географик жойлашуви, табиий, хўжалик, ҳуқуқий режими, тоифалари, сифат хусусиятлари ва қиймати, ер участкаларининг ўрни ва ўлчамлари;

тупроқнинг унумдорлиги (балл бонитети) тўғрисидаги маълумотлар;

б) Сув хўжалиги идоралари томонидан:

қишлоқ хўжалигига мўлжалланган ерларнинг сув билан таъминланганлик даражаси, шу жумладан уларнинг манбаси, йил мавсумларида бўлиши ва етарлилиги;

суғориш учун сув чиқариш усуллари (оқар сув ёки насос орқали етказиб бериш усули), томчилатиб суғориш технологиясини жорий қилинганлиги, мелиоратив ҳолати (коллектор-дренаж тармоғи ҳолати);

суғориладиган ерларнинг мелиоратив ҳолати ва шўрланганлигини яхшилаш бўйича жорий йилда Давлат дастурига киритилган тадбирлар тўғрисидаги маълумотлар;

в) Қишлоқ хўжалиги идоралари томонидан:

қишлоқ хўжалигига мўлжалланган ерларга экилиши белгиланган (экинларни жойлаштириш режаси) қишлоқ хўжалиги экинлари турлари;

мавжуд боғлар, токзор ва тутзорларнинг ҳолати (интенсив усулда экилган боғлар, токзор ва тутзорлар);

вақтинча тарқатилмасдан турган қишлоқ хўжалигига мўлжалланган ерлардан фойдаланиш бўйича имкониятлар (қайси йўналишдаги қишлоқ хўжалиги корхоналари, ташкилотлар ва муассасалар ташкил этиш таклифи) тўғрисидаги маълумотлар;

г) Фермерлар кенгаши томонидан:

фермер хўжаликлари йўналиши (ихтисослиги), шу жумладан кўп тармоқли фермер хўжаликлари;

паст рентабелли зарар билан фаолият юритаётган ҳамда ўз фаолиятида замонавий техника ва технологиялардан кенг фойдаланиб юқори рентабеллик даражасига эришган фермер хўжаликлари тўғрисидаги маълумотлар.

Кўпроқ янгиликлар