Жиззахда ўсимлик ёғи ишлаб чиқарилади 

Иқтисодиёт 08:17 / 19.04.2019 5527

17 апрель куни Ўзбекистон Республикаси президенти ҳузуридаги Лойиҳа бошқаруви миллий агентлиги биносида Агентлик раҳбариятининг “KISS GROUP” (Венгрия) компаниялари гуруҳи вакиллари билан учрашуви бўлиб ўтди. Бу ҳақда ЛБМА ахборот хизмати хабар бермоқда.

Учрашув доирасида Жиззах вилоятини илғор минтақага айлантиришни назарда тутувчи, шу жумладан, инвестицияларни фаол жалб этиш ва юқори технологияли ишлаб чиқаришни ташкил этишни назарда тутувчи “Илғор ҳудуд” пилот лойиҳасини амалга ошириш бўйича Агентликнинг амалга оширилаётган ишлари муҳокама қилинди.

Хусусан, Венгрия томони билан Жиззах вилоятида ўсимлик ёғи ишлаб чиқаришни ташкил этиш бўйича қўшма лойиҳани амалга оширишга оид дастлабки келишувга эришилди (йилига 100 минг тонна ёғ ишлаб чиқариш қувватига эга завод қурилиши). Маҳсулотлар ҳам ички бозорга, ҳам экспортга йўналтирилиши режалаштириляпти.

Шу куни манфаатдор вазирликлар ва идораларнинг таклиф этилган вакиллари билан иккинчи учрашув бўлиб ўтди; унда заводни қуриш учун ҳудудни танлаш, заводни зарур хомашё билан таъминлаш учун Жиззах вилоятида кунгабоқар ва бошқа ёғли уруғларни етиштириш имкониятлари, шунингдек, уруғ етиштиришни мувофиқлаштирувчи ташкилотни танлаш ёки ташкил этиш масалалари муҳокама қилинди (масалан, интегратор ташкилот).

Бундан ташқари, ўсимлик ёғлари ва мол еми сифатида ишлатилиши мумкин бўлган уруғлардан олинган қўшимча маҳсулотларини (иккинчи даражали) сотиш учун қулай савдо нуқталарнинг ва ҳосил учун омборхоналар мавжудлиги ёки уларни яратиш масалалари муҳокама этилди.

Уруғларни (ҳосилни) йиғиш ва ишлаб чиқарилган ўсимлик ёғини истеъмолчиларга етказиш учун логистика тармоғини яратиш каби муҳим масала ҳам муҳокама этилди.

Кўпроқ янгиликлар