Жисмоний тарбия ва спорт вазирлиги ҳузурида янги ДУК ташкил қилинади

Спорт 10:54 / 19.04.2019 4017

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “Ўзбекистон Республикаси Жисмоний тарбия ва спорт вазирлиги ҳузурида “Спорт объектлари инфраструктурасини ривожлантириш бўйича Инжиниринг компанияси” Давлат унитар корхонасини ташкил қилиш тўғрисида”ги қарори лойиҳаси жойлаштирилди.

Ҳужжат билан Ўзбекистон Республикаси Қурилиш вазирлиги ҳамда Жисмоний тарбия ва спорт вазирлигининг Жисмоний тарбия ва спорт вазирлиги ҳузурида “Спорт объектлари инфраструктурасини ривожлантириш бўйича Инжиниринг компания” Давлат унитар корхонасини ташкил этиш тўғрисидаги таклифига розилик берилиши мумкин.

Белгилаб қўйилишича, Ўзбекистон Республикаси Жисмоний тарбия ва спорт вазирлиги Инжиниринг компаниясининг таъсисчиси ҳисобланади.

Инжиниринг компанияга Ўзбекистон Республикаси Жисмоний тарбия ва спорт вазирлиги тизимидаги ташкилот ва муассасалар объектларини қуриш, реконструкция қилиш ва капитал таъмирлаш лойиҳалари амалга оширишда буюртмачи вазифасини бажариш юклатилади.

Инжиниринг компаниянинг асосий вазифалари этиб қуйидагилар белгиланади:

Ўзбекистон Республикаси Жисмоний тарбия ва спорт вазирлиги тизимидаги иншоотларни, шу жумладан спорт иншоотларини қуриш, реконструкция қилиш ва капитал таъмирлаш, шунингдек мебель, жиҳозлар ҳамда техника воситалари билан таъминлаш;

спорт иншоотлари қурилишида белгиланган тартибда пудратчи ташкилотларни танлаш, пудрат шартномаларини тузиш, қурилиш-тиклаш ишларини сифатли ва ўз вақтида бажарилишини таъминлаш;

спорт иншоотларини белгиланган муддатларда фойдаланишга топшириши бўйича прогноз режалари бажарилиши ижросини таъминлаш;
лойиҳа ечимларини самарадорлигини, шаҳарсозлик ва архитектура талабларига мос келишини таъминлаш;

соҳага ажратилган капитал қўйилмалардан самарали фойдаланишни таъминлаш ва лойиҳаларни амалга ошириш муддатларини қисқартириш.

Қуйидагилар Инжиниринг компанияси фаолиятини молиялаштириш манбалари этиб белгиланади:

Жисмоний тарбия ва спорт вазирлиги томонидан тасдиқланган харажатлар сметасига мувофиқ спорт иншоотларини қуриш, реконструкция қилиш ва капитал таъмирлаш ишлари манзилли дастурда кўзда тутилган капитал қўйилмалар лимитлари қийматидан ажратмалар;

хўжалик фаолиятидан тушадиган маблағлар;

халқаро молия институтларининг кредит ва грант маблағлари;

юридик ва жисмоний шахсларнинг хайрия маблағлари ва қонун ҳужжатлари билан таъқиқланмаган бошқа манбалар.

Кўпроқ янгиликлар