Бозор маъмурияти тадбиркордан миллионларни ундиришни талаб қилмоқда

Жамият 14:22 / 19.04.2019 17240

«Сирғали деҳқон бозори» АЖ бозор ҳудудидан ташқарида жойлашган тадбиркордан инфратузилма учун қарийб 42 миллион сўмдан ортиқ тўлов талаб қилинмоқда. Бу ҳақда Dragen LTD МЧЖ раҳбари Kun.uzʼга маълум қилган.

Таъкидланишича, бозор маъмурияти билан низолар 2017 йил келиб чиққан бўлиб, «Сирғали деҳқон бозори» АЖ мутасаддилари Dragen LTDʼни «инфратузилмадан фойдаланганлиги учун тўловни ўз вақтида тўламай келишда» айблаган.

Видео: Mover (tas-ix)

Видео: Youtube

Тадбиркор эса буни инкор этиб, барча коммунал тўловлар учун мустақил шартнома тузгани ва мутасадди ташкилотларга тегишли ҳақни тўлаб келаётганини иддао қилади. У бозорнинг электр, сув ва газидан фойдаланмайди. Ҳатто ўз маблағлари ҳисобидан йўлакка брусчатка ётқизган. Шунга қарамай, судьялар унинг ҳақ-ҳуқуқларини тан олмаётир.

Гап шундаки, 2010 йил «Деҳқон бозорлари ва савдо комплекслари фаолиятини ташкил қилишни янада такомиллаштириш чора-тадбирлари тўғрисида»ги қарор эълон қилинганди. Қарорнинг 4-бандида «бозорлар ва савдо комплексларининг маъмурияти томонидан ундириб олинадиган бир марталик йиғимлар, ижара тўлови ва кўрсатилган хизматлар қиймати миқдорларини тасдиқлаш» белгиланган. Ушбу қарор ижросини таъминлаш мақсадида, 2010 йили тўловларнинг ўз вақтида ва тўлиқ ундирилишини ташкил этиш ва назорат қилиш тартиби тўғрисида Низом тасдиқланган.

Бозор ҳудудида умумий фойдаланиладиган объектларни сақлаш бўйича кўрсатиладиган мажбурий хизматлар учун алоҳида ставкалар жорий қилинган. 

Бироқ, Низом билан тасдиқланган қоидага кўра, «бозорлар, савдо комплекслари ва уларнинг филиалларининг маъмурияти тасарруфида бўлган бинолар, иншоотлар ҳамда бошқа мол-мулкдан ва уларнинг хизматларидан белгиланган тартибда фойдаланувчи юридик ва жисмоний шахслар ижара тўловлари ва кўрсатилган хизматлар учун тўловлар тўловчилари ҳисобланади». Соддароқ айтганда, бозор балансида бўлган бинони ижарага олиб ишлатаётган ёхуд ўз биносига эга, аммо бозор кўрсатаётган хизматлардан фойдаланаётган тадбиркор тўловни амалга ошириши керак.

Dragen LTD МЧЖга тегишли ер-мулк хусусий бўлиб, у бозор тасарруфида эмас. Тадбиркорга 1994 йил 16-майда Тошкент шаҳар ҳокимининг тегишли фармойиши билан ер майдони ажратиб берилган. Буни ер майдони ва бино-иншоотга бўлган ҳуқуқни давлат рўйхатидан ўтказилганлиги ҳақидаги маълумотнома ҳам тасдиқлайди.

Лекин суд жараёнида мулкнинг қонуний эгаси бозор эмас, Dragen LTD МЧЖ эканлигига эътибор қаратилмаганга ўхшайди. Бошқача айтганда, МЧЖ ўзининг қонуний мулки учун бозорга ижара ҳақи тўлашга мажбурланмоқда. Ваҳоланки, бозор маъмурияти ва Dragen LTD МЧЖ инфратузилмадан фойдаланганлик учун тўловларни ундиришга оид шартнома ҳам тузилмаган.

«Сирғали деҳқон бозори» АЖ бош муҳандисининг айтишича, тадбиркор фойдаланаётган электр ва ирригация тармоқларининг соз ҳолатда сақланиб қолиши учун тўловни қилиши керак.

«Лекин трансформаторни тадбиркорлар ўз маблағи эвазига таъмирлаб, алоҳида фирма хизматидан фойдаланади. Энергия тармоғининг созлигини таъминлаш учун 30 фоиз устама ҳақи олинади. Бозор маъмурияти канализацияни ҳам замонавийлаштириш каби ташаббусимизга ҳисса қўшмади. Оқибатда, яна тадбиркор барча ишни бажарди», — дейди МЧЖ раҳбари ўғли

Бобур Холматов МЧЖ раҳбари ўғли

Тадбиркорнинг бир сўзи ақлни шошириб қўйгудек аянчли эшитилди: «Ноҳақ бўлсанг, майли-ку, ҳақ бўла туриб, ҳақлигинг исботлаб беролмасанг, ҳуқуқинг поймол этилишини жим кузатишга мажбур бўлиш аламли экан».

«Ўзининг қонуний мулки учун бозорга ижара тўлаётган тадбиркор қисмати» номли мақолада баён қилинган тадбиркор дуч келган муаммо кўз олдимда гавдаланди. Ана шунда ҳам суд барвақт хулосага келганини тан олган, тадбиркорнинг ҳуқуқларини, кеч бўлса-да, тиклаганига гувоҳ бўлгандим. Ўйлаймизки, Ўзбекистон Республикаси Олий суди ушбу ҳолатни ҳам эътиборсиз қолдирмайди ва қонунда назарда тутилган тартибда кўриб чиқади.

Алишер Рўзиохунов

Кўпроқ янгиликлар