Бокс. Ўзбекистон вакиллари Осиё чемпионатини муваффақиятли бошлади

Спорт 17:45 / 19.04.2019 22982

Бугун, 19 апрелдан Бангкокда бокс бўйича Осиё чемпионати бошланди. 26 апрелгача давом этадиган мусобақада рекорд даражада кўп – 36та терма жамоа иштирок этмоқда.

Эркаклар ўртасидаги дастлабки кунги баҳслар доирасида -64 кг вазн тоифасида рингга кўтарилган Осиё ўйинлари совриндори Шунқор Абдурасулов ироқлик Қадим ал-Эзиреж устидан ғалаба қозонди. Шунқор эртага навбатдаги саралаш жангини покистонлик Амир Масудга қарши ўтказади.

Шунқор Абдурасулов
Фото: Ўзбекистон бокс федерацияси

Ундан сўнг, Осиё ўйинлари ғолиби Бобо-Усмон Ботуров -69 кг вазнда мўғулистонлик Баярку Ганбаатарни муддатидан олдин мағлуб этди. Ўзбекистоннинг амалдаги чемпиони илк раунддаёқ катта устунликка эришиб, рақибни нокдаун ҳолатига туширди; иккинчи раундда эса мўғулистонлик боксчи қошидан жароҳатланиб, жангни давом эттира олмади. Ботуров навбатдаги жангини якшанба куни эронлик Сажжад Козимзодапоштирига қарши ўтказади.

Бобо-Усмон Ботуров
Фото: Ўзбекистон бокс федерацияси

Қайд этиш керак, бу галги Осиё чемпионати илк маротаба эркаклар ва аёллар турнирларини бирлаштирган ҳолда ўтказилмоқда. Унда Ўзбекистон аёллар терма жамоаси 9та вазн тоифасида иштирок этяпти. Бугун -57 кг вазнда Ёдгорой Мирзаева Шри-Ланка вакили Кришми Ланкапураялаге билан жанг қилади.

Ўзбекистон терма жамоаси вакилларининг 20 апрель кунги тақвими:
– 49 кг: Нодиржон Мирзаҳмедов – Д.Хасебэ (Япония)
– 52 кг: Ҳасанбой Дўсматов – Т.Другел (Бутан)
– 56 кг: Миразизбек Мирзахалилов – А.Алибеков (Қирғизистон) / Н.Симфавонг (Лаос)
– 60 кг: Шукуржон Раҳимов – К.Чое (КХДР)
– 64 кг: Шунқор Абдурасулов – А.Масуд (Покистон)
– 75 кг: Исроил Мадримов – Т. Ву (Вьетнам)
– 81 кг: Дилшодбек Рўзматов – Б. Ядав (Ҳиндистон)
– 91 кг: Санжар Турсунов – Х. Хан (Хитой) / С. Бобошев (Қирғизистон)
+ 91 кг: Баҳодир Жалолов – Х. Му (Хитой)

Эслатиб ўтамиз, 10та вазн тоифасидаги баҳсларни ўзида жамлаган ушбу Осиё чемпионати шу йил Россияда бўлиб ўтадиган Жаҳон чемпионатига ҳеч қандай йўлланма бермайди. Халқаро бокс федерациясининг янги тизимига кўра, жаҳон чемпионати ва Олимпиада учун алоҳида лицензион мусобақа ташкил қилинади. Қолаверса, ўтган йили AIBA томонидан Токио Олимпиадаси учун бокс баҳсларида янги вазн тоифалари жорий этилган.

Кўпроқ янгиликлар