Академик Маҳмуд Мирзаев номидаги илмий-тадқиқот институти янада ривожлантирилади

Ўзбекистон 13:21 / 18.04.2019 2161

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “Академик Маҳмуд Мирзаев номидаги боғдорчилик, узумчилик ва виночилик илмий-тадқиқот институтининг фаолиятини янада ривожлантириш ҳамда моддий-техник базасини мустаҳкамлаш чора-тадбирлари тўғрисида”ги қарори лойиҳаси жойлаштирилди.

Қайд этилишича, Ўзбекистон Республикаси Президентининг 2019 йил 20 мартдаги “Ўзбекистон Республикасида боғдорчилик ва иссиқхона хўжалигини янада ривожлантириш чора-тадбирлари тўғрисида”ги ПҚ-4246-сон қарорига мувофиқ Академик М.Мирзаев номидаги боғдорчилик, узумчилик ва виночилик илмий-тадқиқот институти Боғдорчилик ва иссиқхона хўжалигини ривожлантириш агентлиги ихтиёрига ўтказилган.

Қуйидагилар Институтнинг асосий вазифалари ва фаолият йўналишлари этиб белгиланиши мумкин:

боғдорчилик, узумчилик ва цитрусчилик соҳаларида юқори ҳосилли, касалликларга чидамли, рақобатбардош, экспортбоп мева ва узум навларини яратиш ҳамда уларни етиштиришда илмий асосланган ресурстежамкор илғор технологияларни ишлаб чиқиш;

ҳудудларнинг табиий тупроқ-иқлим шароитларини инобатга олиб, мева ва узум навларини жойлаштириш бўйича илмий асосланган тавсиялар ишлаб чиқиш ҳамда хорижий мамлакатлардан олиб келинган истиқболли мева ва узум навларини синовдан ўтказиш ва маҳаллий шароитга мослаштириш;

замонавий ресурстежамкор технологияларни, шу жумладан, томчилатиб ва ёмғирлатиб суғориш тизимларини қўллаган ҳолда кўчатчилик, интенсив боғдорчилик ва иссиқхона хўжалигини ташкил этиш ҳамда ривожлантириш бўйича илмий асосланган тавсиялар ишлаб чиқиш;

боғдорчилик, узумчилик ва виночилик йўналишларидаги хорижий нуфузли илмий муассасалар, олий таълим муассасалари, илмий марказлар билан илмий-тадқиқотлар ишларини олиб боришда халқаро ҳамкорликни кучайтириш, белгиланган тартибда хорижий донор ташкилотларнинг грантлари ва техник кўмак маблағларини жалб қилиш;

юқори малакали илмий ходимлар, яъни фалсафа (PhD) ва фан докторларини (DSc) тайёрлаш, боғдорчилик ва узумчилик соҳасида мутахассисларни ўқитиш, уларнинг малакасини ошириш йўналишида маҳаллий ва хорижий таълим муассасалари, илмий-тадқиқот институтлари, соҳага ихтисослашган хорижий ташкилотлар ва ишлаб чиқарувчилар билан ҳамкорлик қилиш;

боғдорчилик, узумчилик ва виночилик соҳалари ривожланган хорижий мамлакатларнинг илғор тажрибаларини ҳамда боғдорчилик ва узумчиликдаги қишлоқ хўжалиги техникаларини ўрганиш бўйича илмий-тадқиқотлар олиб бориш ва уларни амалиётга қўллаш учун тавсиялар ишлаб чиқиш;

виночилик соҳасида янги, юқори сифатли, рақобатбардош, экспортбоп вино ассортиментларини яратиш ва қайта ишлаш технологияларини ишлаб чиқиш бўйича илмий-изланишлар олиб бориш ва тавсиялар бериш;
халқаро стандартларга мос ва экспортбоп мевали дарахт, ток, резавор ва цитрус ўсимликларининг кўчатларини етиштириш ҳамда уларни реализация қилиш.

Белгиланишича:

а) Институт:

ўз фаолияти бўйича Агентлик ва Ўзбекистон Республикаси Қишлоқ хўжалиги вазирлигига ҳисобот беради;

Ўзбекистон Республикаси Давлат бюджети маблағлари ва қонун ҳужжатлари билан таъқиқланмаган бошқа манбалар ҳисобидан молиялаштирилади.

б) Институт директори Агентлик Бош директорининг тақдимномасига биноан Ўзбекистон Республикаси Қишлоқ хўжалиги вазири томонидан лавозимга тайинланади ва лавозимидан озод этилади;

мақоми, меҳнатга ҳақ тўлаш ва транспорт хизмат кўрсатиш шартлари бўйича Агентлик Бош директори ўринбосарига тенглаштирилади;

в) Институт директори ўринбосари Институт директорининг тақдимномасига биноан Агентлик Бош директори томонидан лавозимга тайинланади ва лавозимдан озод этилади;

г) Институт тасарруфида бўлган қишлоқ хўжалигида фойдаланилмайдиган 0,5 гектар ер майдонида давлат-хусусий шериклик асосида Институт ходимлари учун кўп қаватли турар-жой мажмуасини барпо этиш тўғрисидаги таклифларига розилик берилади.

д) “Ипотека-банк” акциядорлик-тижорат ипотека банки, кўп қаватли турар-жой мажмуаси қурилишида пайчилик асосида қатнашадиган ходимларни қўллаб-қувватлаш мақсадида уларга имтиёзли шартларда узоқ муддатли ипотека кредитлари ажратилишида амалий ёрдам кўрсатишлари тавсия этилади.

Кўпроқ янгиликлар