Тошкентдаги қурилиш моллари бозорларида ялпи паспортлаштириш тадбирлари ўтказилмоқда

Жамият 19:14 / 17.04.2019 3702

Тадбиркорлик субъектлари томонидан солиқ қонунчилигига риоя этилишини профилактика қилиш мақсадида Тошкент шаҳридаги қурилиш моллари савдосига ихтисослашган бозорларда ялпи паспортлаштириш тадбирлари ўтказилмоқда.

“Жомий” қурилиш моллари бозоридан бошланган ушбу тадбирлар хўжалик субъектларини текшириш билан умуман боғлиқ бўлмай, асосий мақсад тадбиркорларга солиқ қонунчилигига риоя этишлари учун амалий ёрдам ва маслаҳат бериш, тадбиркорлар муаммолари ва таклифларини ўрганишдан иборат, деб ёзади Давлат солиқ қўмитаси матбуот хизмати.

Қайд этилишича, паспортлаштириш тадбири давомида тадбиркорлик субъектларига нисбатан ҳеч қандай маъмурий ва молиявий жарималар қўлланилмайди ҳамда мавжуд тушунмовчиликлар ва камчиликлар ҳамкорликда бартараф этилади.

– “Жомий” бозорида кафель ва керамика маҳсулотлари савдосига ихтисослашган 2 та дўконимиз бор, – дейди “Summit Ceramics” МЧЖ директори Мирсаид Ғойибов. – Солиқ хизмати ходимлари дўконимизга ташриф буюриб, паспортлаштириш тадбири ўтказилаётганини ва бу фаолиятимизни қонуний асосда юритиш учун кўмаклашишга қаратилган тадбир эканлигини тушунтиришди. Ишчи-ходимларнинг меҳнат шартномаларини, фаолиятимга доир ҳужжатларни, касса ва терминал аппаратларининг созлигини кўздан кечиришди. Ҳаммаси жойида эканлигини кўриб, фақат терминал ва касса аппаратларини доимий равишда ишлашини таъминлаш, харидорлар исталган вақтда нақд ва нақдсиз кўринишда савдо қилишларига шароит яратилиши лозимлигини уқтиришди.

Солиқ хизмати ходимлари нафақат муаммоларимизни бартараф этиш, балки таклифларимизни ҳам билдиришимизни сўрашди. Биз савдо айланмамиз 3 млрд сўмдан юқори бўлгани учун қўшилган қиймат солиғи тўловчиси ҳисобланамиз. Қўшилган қиймат солиғи бўйича “занжир” тўлиқ ишлашини таъминлаш, савдо ҳамкорларимиз билан ушбу механизм асосида бемалол савдо-сотиқ қилиш учун шароит яратишларини сўрадим.  

Хабарда айтилишича, “Жомий” бозоридаги тадбирнинг биринчи куни давомида 73 та объектда паспортлаштириш ўтказилди. Натижада 45 нафар жисмоний шахс меҳнат шартномаси тузмасдан ишлаётганлиги, 3 нафар жисмоний шахс давлат рўйхатидан ўтмасдан тадбиркорлик билан шуғулланаётганлиги ва 21 та объектда ижара шартномалари кам суммада расмийлаштирилганлиги аниқланди ва профилактик тадбирлар давомида бу ҳолатлар бартараф этилди.

Шу билан бирга, барча субъектлар томонидан кунлик нақд пул тушумлари яширилаётганлиги маълум бўлиб, бу борада тушунтиришлар олиб борилди.

“Давлат солиқ қўмитаси барча тадбиркорлик субъектларидан амалга оширилаётган паспортлаштириш чора-тадбирларини тадбиркорлик субъектларида фаолият юритаётган ишчи-ходимлар ҳисобини аниқ юритиш ва ҳужжатлар қонун доирасида расмийлаштирилишига қаратилган саъй-ҳаракатлар сифатида қабул қилинишини сўрайди”, дейилади хабарда.

Кўпроқ янгиликлар