Озодликдан маҳрум этилган шахслар учун умумий таълим ва касб-ҳунарга ўқитиш тизими такомиллаштирилади 

Ўзбекистон 20:08 / 17.04.2019 2745

“Озодликдан маҳрум этилган шахслар учун умумий таълим ва касб-ҳунарга ўқитиш тизимини такомиллаштириш чора-тадбирлари тўғрисида”ги Вазирлар Маҳкамаси қарори тасдиқланди.

Қарорга мувофиқ, Тошкент вилояти Ички ишлар бошқармаси Пробация ва жазоларни ижро этиш бўлими Тарбия колониясининг 5-умумтаълим мактаби Зангиота тумани халқ таълими бўлимининг 35-умумтаълим мактабига бирлаштирилди. Ҳужжатда Тошкент вилояти Ички ишлар бошқармаси Пробация ва жазоларни ижро этиш бўлими Тарбия колониясининг 5-умумтаълим мактаби мулкий негизида ушбу умумтаълим мактабининг филиали ташкил этилиши белгиланди. 

Ҳужжатда кўрсатилишича, Олий ва ўрта махсус таълим вазирлиги Касб-ҳунар таълими марказининг жазони ижро этиш муассасалари ҳудудида жойлашгаи касб-ҳунар таълими муассасалари қарорда келтирилган иловага асосан Бандлик ва меҳнат муносабатлари вазирлиги тасарруфига ўтказилади ҳамда улар касб-ҳунарга ўқитиш марказларига айлантирилади.

Қуйидагилар касб-ҳунарга ўқитиш марказларининг асосий вазифалари этиб белгиланди:

миллий ғояга садоқат ва ватанпарварлик руҳида тарбиялаш, маънавий бой, мустақил дунёқарашга эга ва мустақил фикрлайдиган баркамол шахсни шакллантириш;

давлат таълим стандартлари доирасида маҳкумларнинг сифат жиҳатидан юқори даражада билим олиши ва уларни касбга тайёрлашни таъминлайдиган умумтаълим ҳамда касб-ҳунар таълими дастурларини амалга ошириш;

маҳкумларни жазодан озод этилганидан сўнг жамиятга мослаштириш мақсадида меҳнат бозорида талаб этилган касбларни эгаллаши учун уларга меҳнат кўникмаларини сингдириш ва мустаҳкамлаш.

Қарорда белгиланишича:  

умумтаълим мактабларининг жазони ижро этиш муассасалари қошидаги филиаллари Халқ таълими вазирлигининг тегишли туман (шаҳар) бўлимларига бўйсунади;

умумтаълим мактабларининг жазони ижро этиш муассасалари қошидаги филиалларида ўқувчи маҳкумлар сонидан қатъи назар синфлар очишга рухсат этилади;

касб-ҳунарга ўкитиш марказлари мустақил юридик шахслар ҳисобланади ва Ички ишлар вазирлигининг асосланган буюртманомалари бўйича ташкил этилади ҳамда Бандлик ва меҳнат муносабатлари вазирлиги тасарруфида бўлади;

умумтаълим мактабларининг жазони ижро этиш муассасалари қошидаги филиаллари ҳамда касб-ҳунарга ўқитиш марказлари жазони ижро этиш муассасалари ҳудудида жойлаштирилади;

касб-ҳунарга ўқитиш марказларида маҳкумларнинг муайян турдаги ишларни бажариш учун зарур касбий билим ва меҳнат кўникмаларини эгаллашипи тезлаштиришга қаратилган ўқув режалари ва дастурлари асосида таълим берилади;

касб-ҳунарга ўқитиш марказларининг раҳбарлари, педагоглари ва бошқа ходимларига Олий ва ўрта махсус таълим вазирлигининг Касб-ҳунар таълими маркази касб-ҳунар таълими муассасаларининг тсгишли лавозимлари учун белгиланган базавий тариф ставкаларига мувофиқ меҳнатга ҳақ тўлаш шартлари татбиқ этилади.

2019/2020 ўқув йилидан бошлаб, касб-ҳунарга ўқитиш марказларини давлат таълим стандартлари доирасида ўқув режалари ва дастурлари, шунингдек, уларнинг кутубхона фоидлари зарур ўқув-услубий адабиёт билан босқичма-босқич таъминланади.

Кўпроқ янгиликлар