Ўзбекистон ва Озарбойжон консуллик соҳасида биринчи маслаҳатлашувлар ўтказди

Жаҳон 09:29 / 17.04.2019 1425

2019 йилнинг 12 апрель куни Тошкент шаҳрида Ўзбекистон ва Озарбойжон ўртасида консуллик соҳасида биринчи маслаҳатлашувлар бўлиб ўтди.

ТИВ хабарига кўра, учрашувда консуллик-ҳуқуқий соҳада икки мамлакат ўртасида баҳсли масалалар мавжуд эмаслиги таъкидланган ҳамда ҳамкорликни янада ривожлантириш истиқболлари, икки давлат қонунни қўлловчи органлари ўртасидаги жорий алоқаларга доир масалалар муҳокама қилинган.

Миграция соҳаси, фуқаролик, оилавий ва жиноий ишларда ҳуқуқий ёрдам кўрсатиш масалаларига алоҳида эътибор қаратилди, дейилади хабарда.

Музокаралар якунига кўра маслаҳатлашувлар ўтказиш тўғрисида протокол имзоланди. Мазкур ҳужжат икки мамлакат манфаатдор органлари ўртасида консуллик-ҳуқуқий соҳада эришилган келишувларни амалга оширишни тартибга солади.

Музокараларда икки томондан ҳам ташқи ишлар, адлия, ички ишлар, меҳнат вазирликлари, бош прокуратура, чегара хизматлари консуллик хизматлари ва Озарбойжоннинг Тошкент шаҳридаги элчихонаси вакиллари иштирок этди.

Кўпроқ янгиликлар