Ўзбекистон миллий жамоаси ва «Шаржа» клуби яримҳимоячиси Отабек Шукуров Лондонда ўнг оёғи болдиридан муваффақиятли операция қилинди. Бугун, 17 апрель куни БАА клуби расмий твиттерига унинг жарроҳлик амалиётидан кейинги видеомурожаати жойлаштирилди.

«Операциядан чиқдим, мен билан ҳаммаси жойида. Аҳволим яхши. Иншааллоҳ, тез орада кучли бўлиб қайтаман.

Бугун «Ал-Айн»га қарши ўйин. Ҳамма футболчиларга омад. Иншааллоҳ, бугун ғалаба қозонамиз», – деган Шукуров инглиз тилида.

БАА чемпионатининг 21-тури доирасидаги «Ал-Айн»га қарши ўйин бугун Тошкент вақти билан соат 21:30да бошланади. 20-турдан кейин шаржаликлар энг яқин таъқибчисидан 9 очкога ўзиб кетган ҳолда пешқадамлик қилмоқда. Ал-Айн амирлиги жамоаси эса тўртинчи ўринда боряпти.

Отабек ўтган турдаги «Банияс»га қарши сафардаги ўйинни (2:1) бевосита стадиондан томоша қилган.

Эслатиб ўтамиз, Шукуров март ойидаги ФИФА кунларида Хитойда бўлиб ўтган «China Cup» турнири доирасида мезбонларга қарши ўйинда шикастланиб, тахминан 2 ойга сафдан чиққанди.