«Ренн» хўжайини ёнғиндан зарар кўрган Нотр-Дам черкови таъмири учун 100 млн евро ажратади

Спорт 10:54 / 16.04.2019 7586

«Ренн» клуби хўжайини, Франциянинг энг бадавлат одамларидан саналувчи миллиардер Франсуа Пино Париждаги Муқаддас она ибодатхонасини ёнғиндан кейинги реконструкцияси учун 100 млн евро ажратади. Бу ҳақда унинг ўғли кичик Пино маълум қилди, деб ёзади Le Figaro.

«Отам ва мен «Artemis» компанияси фондидан ибодатхонанинг тўлиқ таъмири учун 100 млн евро ажратишга қарор қилдик», – деб айтган Франсуа-Анри Пино.

Маълумот учун, Франсуа-Анри Пино – Kering компанияси хўжайини саналади. Ушбу компания Gucci, Yves Saint Laurent ва Alexander McQueen каби брендларга эгалик қилади.

Франция пойтахтидаги Нотр-Дам де Пари черковида кеча, 15 апрель куни кечаси ёнғин юз берди. Тўққиз соат давом этган ўт ўчириш ишлари натижасида ёнғин бартараф этилган. Ҳодиса оқибатида ибодатхона шпили ва томи қулади, бино каркаси сақлаб қолинди.

Дастлабки маълумотларга кўра, ёнғин черковдаги реставрация ишлари вақтида юз берган. Париж прокуратураси айни пайтда ҳодиса сабабларини ўрганмоқда.

Қайд этиш керак, 900 йилдан кўпроқ тарихга эга машҳур черковдаги ёнғин муносабати билан француз футболининг энг таниқли вакилларидан Зинедин Зидан ва Килиан Мбаппе қайғуда эканини билдиришган.

Кўпроқ янгиликлар