Ўтган йили Қозоғистонда Ўзбекистон йили кенг миқёсда нишонланганди, унинг доирасидаги тадбирлар халқлар ўртасидаги дўстлик ва қардошлик муносабатларни янада мустаҳкамлашга хизмат қилган.
Мазкур улкан маданий воқеанинг мантиқий давоми сифатида бу йил Ўзбекистонда Қозоғистон йили эълон қилинди ва у Қозоғистон президентининг Ўзбекистонга давлат ташрифи доирасида очилди.
15 апрель куни Тошкент шаҳридаги «Ўзбекистон» халқаро анжуманлар саройида бўлиб ўтган маданий кечада Ўзбекистон ва Қозоғистон давлат раҳбарлари иштирок этиб, нутқ сўзлади. Маросимни Ўзбекистон Республикаси Президенти Шавкат Мирзиёев очиб, қардош қозоғистонликларни юртимизга ташрифи билан қутлади. Қозоғистон Президенти Қасим-Жомарт Тоқаев ўз нутқида Ўзбекистонда қозоқ тили ва маданиятини ривожлантиришга қаратилаётган эътибор учун миннатдорлик билдирди.
Маданий кеча қозоғистонлик санъат усталари томонидан тайёрланган концерт дастурига уланиб кетди.
